HUMAN sa dugay nga pagkatanggong sa iyang karera sa boksing, mobalik na’g away ang kanhi ALA fighter nga si Mark “Magnifico” Magsayo ugma diin iyang ikaharong si Indonesian Erick Deztroyer sa The Ring Boxing Community sa Singapore.
Si Magsayo katapusang miaway niadto pang Nobiyembre 25, 2017 sa iyang yutang natawhan sa Tagbilaran City diin midaog siya pinaagi sa unanimous decision batok kang Japanese Shota Hayashi.
Naghupot og 18-0, 13KOs nga rekord si Magsayo samtang adunay 12-4-1, 3KOs nga rekord si Deztroyer.
Dugay nga wala nakaaway si Magsayo gumikan sa iyang pagbiya sa ALA Promotions nga adunay kakulian kabahin sa iyang kontrata.
Pasabot ni Magsayo nga na-expire na ang iyang promotional ug managerial nga mga kontrata sa ALA Promotions sa iyang pagbalhin sa laing promoter.
Apan gitataw ni ALA Promotions president Michael Aldeguer nga niadtong higayuna, ang managerial contract ra maoy ni-expire ug dili ang promotional contract.
Ang ALA Promotions mipasaka og reklamo nga breach of contract ngadto sa Games and Amusements Board (GAB) hinungdan nga wala nakaaway og dugay si Magsayo nga maoy hinungdan nga natangtang siya sa world rankings.
Si Magsayo kanhi No. 1 featherweight sa World Boxing Organization (WBO).
Mi-text ang Sun.Star Cebu kang Aldeguer aron sutaon unta kon wala na ba’y kakulian kabahin sa kontrata ni Magsayo ning panahuna apan wala pa kini motubag. (EKA, ESL)