SIKOP sa mga otoridad ang 81 anyos nga lolo human giingong nanglugos og 8 anyos nga batang babaye sa Barangay Molugan, dakbayan sa El Salvador Misamis Oriental.
Si PLt. Col Randy Anito, hepe sa El Salvador City Police Station, miila sa suspetsado nga si Enemecia Estor, usa ka manghihilot ug residente sa susamang dapit.
Gibutyag ni Anito sa SunStar Superbalita nga nahitabo ang pagpanglugos niadtong bulan sa Pebrero ning tuig diin kining 8 anyos nga bata kuyog ang iyang manghod nga 3 anyos ang nagpahilot.
Matud ni Anito nga ang tighilot sa dapit wala niadtong tungora hinungdan didto sila gi-refer kang Estor.
Pag-abot sa puloy-anan sa tigulang, gihilot sab niini iyang manghod sa 8 anyos ug sa pagpanguli na nagbilin og mensahe sa 8 anyos.
“Giingnan niya ang 8 anyos nga day, pagbalik diri ugma kay aron mawala ang sumpa sa imong manghod,” saysay ni Anito.
Sa kahadlok pod sa 8 anyos nga bata ug pagtuong gisumpa ang iyang manghod, nibalik ang bata ug didto nahitabo ang pagpanglugos.
Human sa insidente, gitug-an kini sa bata sa iyang inahan hinungdan nagpatabang sa kapolisan.
Matud ni Anito nga usahay malimtan na ang kaso tungod kay kapoyan na og balik sa istasyon ang ginikanan hinungdan nga iyang gaabisohan ang iyang mga sakop sa Womens and Children Protection Desk (WCPD) nga balik-balikan aron masumbong ug mahatagan sa hustisya ang biktima.
Dihang nigawas ang warrant of arrest batok sa suspek, ila kining giambakan niadtong April 10 sa buntag ug gidakop si Estor.
Samtang giangkon ni Estor sa iyang nahimo sa biktima.
Nanawagan
Hangyo ni Anito sa mga ginikanan nga unta dili isalig ang mga “pagpahilot” ngadto sa ilang mga anak.
“Sa tinoud lang tulubagon kini sa mga ginikanan nganong gakaingon ani ilang mga anak. kumpiyansa kaayo sila. Unsa man tawon hanaw anang 8 anyos, bata pa kaayo. Hinaot magsilbi kining leksyon sa mga ginikanan.” dugang ni Anito.
Ang suspetsado nga nagtingkagol na sa prisuhan karon ang nag-atubang og kasong rape ug walay girekomendar nga piyansa ang korte.