DUL-AN tulo ka oras nga gikumbati sa mga bombero ang kalayo human nasunog ang duha ka mga bodega mga alas 8:22 sa gabii sa Julio-Pacana Streets, Barangay Puntod, dakbayan sa Cagayan de Oro.
Nitala og P3.6 milyones nga danyos ang pagkasunog sa bodega sa sibuyas ug mga ligid nga gipanag-iyahan ni Jason Ang. Usa niini girentahan Henry Yu nga gihimong buhatan sa mga bodega sa ligid samtang ang usa ka bodega gisuta pa kong kinsa ang nagrenta niini.
Sa pakighinabi sa SunStar Superbalita kang Fire Officer 3 Jesrel Lazaga, imbestigador sa Bureau of Fire Protection (BFP), gibutyag nga dili pa matumbok ang tinubdan sa kalayo.
Ang mga bombero nigamit og chemical foam aron pagkontrola sa kalayo.
Gidugang pa niini nga gitan-aw usab sa ilang buhatan ang anggulo sa giingong kalit nga pagsila sa linya sa kuryente.
Sa pagsulat niini nga balita, padayon ang pagpahigayon og overhauling sa mga bombero samtang gideklara kining under control mga alas 10:05 sa gabii nga niabot og ika-upat nga alarma human nadawatan ang tawag gikan ni Jestoni Saragosa.
Sunog sa Carmen
Samtang mokabat usab sa P2.5 milyones ang natalang damyos human nasunog ang tulo ka mga patigayon sa Vamenta boulevard, Barangay Carmen susamang adlaw.
Matud ni Senior Fire Officer 3 Samson Velarde, ground commander, nga gideklarang fire out mga ala 1:11 sa hapon diin giingong walay tawo ang maong lawak sa dihang natigayon ang sunog ug gitutokan ang anggulo nga posibilidad niini mao ang mga nalimtan nga mga gamit nga posibleng wala ma-ibot gikan sa pagkasaksak sa kuryente.