NANGAYO og depensa ang Cagayan de Oro Electric & Light Company (Cepalco) sa upat ngadto lima ka oras nga blackout sa halos tibuok bahin sa dakbayan sa Cagayan de Oro niadtong Miyerkules sa gabii nga nagsugod sa alas 6 kapin sa gabii.
Gipasabot ni Marilyn Chavez, assistant vice president head sa customer & community relations department sa Cepalco, nga ang pagkapalong sa kuryente wala sa ilang iskedyul hinungdan dunay pagsusi sa linya ug nakumpirma nga halos walay kuryente sa tanan nilang franchise area.
Usa sa gitumbok nga hinungdan mao ang problema sa ilang primary line sa lungsod sa Villanueva, Misamis Oriental.
Wala pa usab nila nakumpirma kon unsay hinungdan nganong kalit ang pagkawala sa kuryente kay ila pa kining gisuta hangtod karon panahona.
“Total blackout gyod siya starting 6:15 p.m. Naka trigger ang Villanueva ang primary line,” matud ni Chavez.
Aduna silay laing source sa kuryente nga hangtod karon panahona maoy ilang gigamit ug maoy giapod-apod sa katawhan hinungdan adunay parte sa dakbayan nga nabalik 30 minutos gikan sa pagkapalong niadtong gabhiona labina sa Carmen feeder.
Gipangsusi sab nila ang tanan nga mga linya hinungdan nga inanay nga nagbalik ang kuryente sa pipila ka feeder.
Adunay mga feeder nga apektado dinhi sa siyudad gumikan sa sunog nga nahitabo sa siyudad sa Cagayan de Oro sama sa Puntod area.
Labing ulahing nabalik nga kuryente mga alas 12 na sa kadlawon kagahapon kon diin uwahing nabalik sa Baloy Feeder 2 nga mikober sa Lapasan-Gusa-Cugman-Baloy nga area.
Si Chavez nihangyo sa katawhan sa pagsabot gumikan kay wala kini naka skedyul ug sa pagkakaron padayon nga gisuta ang hinungdan niini tungod kay una pa kining nahitabo.
Lakip ang BUSECO sa Bukidnon nagpahibalo nga daghan parte sa Bukidnon ang nag-blackout mga alas 6:15 gihapon sa gabii ug nipasabot nga ang pag trip off sa 69kv line protection sa NGCP Tagoloan Substation maoy usa sa ilang gitumbok nga hinungdan.