HEPE sa Philippine National Police (PNP) wala mabalaka sa bahad ni Cebu City Mayor Tomas Osmeña nga iyang bawian sa allowance ang mga police sa siyudad sa Sugbo kung dili masulbad ang nahitabong pag rakrak sa balay sa duha niya ka kapitan sa bukid.
Misaad noon si Police General Oscar Albayalde nga adunay himuon nga imbestigasyon sa insidente sa pag rakrak sa mga balay sa tulo ka kapitan sa bukirang dapit sa siyudad sa Sugbo nga pulos kaalyado ni Osmena.
Matod ni Albayalde nga kung tinuod ang pasangil sa mayor nga police ra usab ang nagpaluyo sa maong pagpang rakrak, angayan nga silotan kini nga mahimong ikataktak niini sa serbisyo.
Apan angayan nga mo presentar og mga ebedensya ang nag akusar ug dili lang alegasyon nga pulos sulti nga walay ikapakita nga magpalig-on sa mga pasangil sa kapulisan.
Wala noon mabalaka si Albayalde nga bawion tanan sa mayor ang suporta nga gihatag sa lokal nga kagamhanan sa kapulisan sa siyudad sa Sugbo ug andam pa kini nga muhatag sa budget para sa gamitanan sa police station sama sa gasolina ug uban pa sanglit adunay silay maintenance and other operating expenses (MOOE) sa PNP.
“Ginawa naman niya yun I'm sure the DILG will be made to explain if they don’t want to give support, we can support our people on the ground. Rest assured we can give support to our people on the ground. Up to the station and PCP level. Meron kaming MOOE. If they dont want to support the PNP, thats their problem, not ours,” matod pa ni Albayalde.
Gihulagway sa heneral si Mayor Osmeña nga nag binata ilabi na sa iyang pag tratar sa kapulisan sa siyudad sa Sugbo.
Apan wala nay mahimo si Albayalde sa gipakita nga batasan sa mayor nga matod niya nga mao nay naandan niini.
“Well ano yan eh. Sometimes yung iba sa atin we act like a child. Nasa atin yun eh. Thats their personality. We have to live with that,” dugang ni Albayalde.
Una nang naka saway ang mayor sa pamunoan ni Cebu City Police Office (CCPO) Director Royina Garma nga iyang gihulagway nga maoy labing ngil-ad nga City Director sa kasaysayan sa dakbayan human gipaarakan sa armas ang balay nilang kapitan Dennis Dabuco sa Malubog, Pricillo Albores sa Sudlon 2 ug Aurello Lascuña sa Sinsin.