SECTIONS
Monday, September 16, 2019
SUPERBALITA CEBU

Rabacal: Nagkatuali nga mga ebidensya

Pakabana

NAA na usay laing batan-on ang hidakpan sa kapulisan sa linuog nga pagpatay kang Christine Lee Silawan niadtong Martes sa buntag. Lahi niadtong unang suspek, kini siya hamtong na og pangidaron nga nagpuyo duol sa dapit diin nakit-an ang patay nga lawas ni Christine sa Sityo, Mahayahay, Barangay Bankal, Lapu-Lapu City. Ning pagsuwat, wa pa nganli ang maong dinakpan ug wa pa usab mohatag og dugang detalye ang Lapu-Lapu City police sa ilang operasyon sa pagdakop sa maong suspek. Sumala sa kapulisan nga ang dinakpan adunay kasayuran sa kamatayon ni Christine. Wa hinuon masayri kon nakakita ba siya sa pagpatay o aduna ba siyay kalambigitan sa pagpatay sa 16-anyos nga biktima.

Sa laing bahin, si medico-legal officer Benjamin Lara sa police crime laboratory mi-insister nga wa gayud lugosa si Christine sa wa pa kini patya. Wala usab siya magtuo nga gibubo-an og asido ang nawong sa biktima sukwahi sa finding sa forensic expert sa Public Attorney’s Office (PAO) nga si Dr. Erwin Erpe.

Nahadlok ako nga kon dili magkasinabut kining findings sa PNP ug sa PAO nga moguwa og kataw-anan ang atong mga tinugyanan sa balaud. Tingalig makahatag pa kinig pagduda sa fiscal o kaha sa huwes kon ipasaka man kining maong kaso ngadto sa hukmanan. Hinaut pang ipunting sa mga tinugyanan sa balaud ang ilang mga paninguha sa pagdakop sa mga naghimo sa krimen ug sa pagpangita sa hinagiban nga gigamit sa pagpatay kang Christine inay nga magsigi og paghibawo sa ilang findings nga nagkatunyagi.

•••

Dalaygon ang gihimo sa ubang mga non-profit organizations ug mga adunahan diri sa Bay Area sa California, U.S.A. Sa paninguha nga mapreserbar ang uban nilang kayutaan nga dili gamiton alang sa pagtukod og housing projects o tukoran ba kaha og mga buildings ila kining gipalit aron magpabilin kining bakante kun open-space hangtud sa hangtud. Naa gani uban nga dili buot nga ang mga bakanteng dapit tamnan og mga tanum nga dili angayan sa usa ka dapit sama sa grapes. Imong makita labi na sa duol sa mga watershed areas nga hawan kaayo kini nga gigamit lamang nga sibsibanan sa mga baka ug ubang mananap. Dili sila buot nga maparehas sa San Francisco nga puno na sa mga housing projects ug mga tag-as nga building. Daghan diri ang nananum og cherries, pears ug ubang mga prutas nga maoy kalingawan sa katawhan sa pagpalit nga sila mismo ang mamupo. Bayran nila ang ilang dad-on apan libre ang ilong kan-on sa punoan. Gipreserbar gayud diri sa Bay Area ang rural atmosphere bisan anaa kini sa siyudad sama sa Brentwood. Nindut kaayo ang mga buwak sa cherries, cherry blossoms, mustard, ug uban pa nga maglaray sa kadalanan tungod kay Spring season karon diri sa Estados Unidos. Bugnaw usab ang panahon labi na kon maghangin- hangin. Kini usa sa mga maanindut nga panahon nga ibisita diri sa San Francisco ug sa Bay Area sa California. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph