NIKATAP sa social media ang episode 3 sa video nga “The Real Narcolist (Ang Totoong Narcolist).” Ang nagpakatap niini, usa ka “Bikoy” nga niangkon nga kanhi sakop sa usa ka drug syndicate, nipasangil nga si Bong Go adunay dragon tattoo, ilhanan sa mga sakop sa sindikato.
Sumala pa niini, si Bong Go, nga ikaupat na sa mga senatoriables sa survey nga gihimo sa Pulse Asia gikan sa Marso 23 ngadto sa 27, nakadawat og mokabat sa P3 bilyones gikan sa maong sindikato gikan sa 2010 hangtod sa 2018.
Nidugang kini nga si Go nigamit sa code name nga “Tesorogolf-TSG-002” nga gipatik sa buko-buko ni Go. Tesoro and middle name ni kanhi Special Assistant to the President Christopher “Bong” Go.
•••
Apan si Bong Go, sa usa ka press conference niadtong Miyerkoles didto sa lungsod sa Prosperidad, Agusan del Sur, mihubo sa iyang t-shirt ug mipakita sa iyang buko-buko sa mga sakop sa media. Apan way nakitang dragon tattoo.
Si Presidential Spokesperson Salvador Panelo niingon nga ang maong video usa lang ka “black propaganda.” Apan matod niya dunay mga tawo nga motuo niini, “hook, line and sinker,” bisan pag di kini tinuod.
Ang kuyaw kon ang sunod nga video moingon nga ang code name hipatok sa kinatawo ni Bong Go. Iya kaha usab kining ipakita? Duna kahay makita?
•••
Sa wa lang damha ug sa wa pa mahibaw-ing hinungdan, gi-endosar ni Cebu City Mayor Tomas Osmena si Bong Go atol sa proclamation rally sa Bando Osmeña Pundok Kauswagan (BOPK) didto sa Cebu City Sport Center niadtong Marso 30.
Ang Sugbo adunay kapin sa tres milyones ka mga botante, ang labing daghan og mga botante sa mga lalawigan sa tibuok Pilipinas. Lakip na niini ang kapin sa 700,000 ka mga botante sa syudad sa Sugbo, kapin 226,000 sa Mandaue ug kapin sa 214,000 sa Lapu-Lapu.
Makatabang ang Sugbo sa kadaugan ni Go nga ikaupat na sa survey. Ang nag-unang tulo sa Pulse Asia survey mao ang mga reelectionist nga sila si Senador Grace Poe, Cynthia Villar ug Sonny Angara.