MGA duwa karon:
(Sogod Municipal gym)
4:30 pm. Tabuelan vs. Talisay City
6:00 pm. Alegria vs. Consolacion
7:30 pm. Sogod vs. Minglanilla
Gipakaging sa Balamban Ship Builders ang host Dumanjug squad, 77-71, sa pagsugod sa Bracket A quarterfinals round sa 3rd Cebu Governor’s Cup Inter-cities/municipalities 21-under basketball tournament nga gipahigayon Miyerkules sa gabii, Abril 10, sa Municipal Gym sa Dumanjug, probinsiya sa Sugbo.
Si EJ Sacayan kinsa miani lang og dos puntos sa first half, mipabaha og 16 sa third quarter, upat niini gikan sa three-point area, nga maoy nagwanang sa ilang dalan paingon ngadto sa kadaugan.
Sikit nga kombati ang masaksihan sa unang duha ka period diin igo lang nakalabaw og kuwatro puntos ang Balamban, 32-28. Apan diha na sa third quarter mibingat ang Ship Builders ni coach Dave Seblos nga gidayandayanan sa pagpanginit sa mga kamot ni Sacayan.
Maayo usab nga nakatimang sa ilang opensa si Joshua Gellacone nga may 16 puntos, 14 usab gikan ni Dede Fernandez ug nuebe puntos ang natampo ni Marvin Cortes.
Sa sayo pa, gibuntog sa Mandaue City ang Danao City, 76-69, samtang gilubong sa Medellin ang Samboan, 90-59.
Sa Bracket B nga didto duwaa sa Tuburan Municipal Gym, gipukan sa host Tuburan Coffe Makers ang Alegria team, 98-75. Gilampornas usab sa Minglanilla Archangels ni coach Edito “Itoy” Salacut ang Tabuelan, 95-69. Sayong miarangkada ang Archangels sa first half ug wala na kini molingi pa.
Wa usab magpabitin ang Consolacion sa unang adlaw sa quarterfinals ug ilang gikastigo ang Sogod, 98-75.
Karong adlawa, Biyernes, Abril 12, motapon ang mga duwa diha sa Sogod Municipal Gym. Ikasangka sa host Sogod (0-1) ang Minglanilla (1-0) sa main game samtang magsangka ang Consolacion (1-0) ug ang Alegria (0-1) sa second game.
Subhan na usab ang defending champion Talisay Aquastars sa quarterfinals sa dihang ilang ika-engkuwentro ang Tabuelan.