USA ka isolated case ug way labot sa duwa ang nahitabong pagpamato sa service bus sa Alegria niadtong Miyerkules sa gabii sa pagsugod sa quartefinals round sa 3rd Cebu Governor’s Cup nga didto gipahigayon sa municipal gym sa Tuburan.
“Isolated case ra gyud to. Mora og paregla ba. Kay layo na man ang bus sa venue unya on the way na man sila pauli,” kini maoy nalantawan ni Atty. Ramil Abing, ang executive director sa Cebu Provincial Sports Commission (CPSC) sa dihang gikahinabi sa Superbalita.
Matod pa sa taho nga human mapildi ang Alegria sa Tuburan, 98-75, padulong na kining miuli ug sa dihang paghiabot nila sa may barangay Molobulok sa Tuburan kalit king gibato hinungdan sa pagkabuak sa windshield habig sa driver.
Gibati og kahadlok ang kinatibuk-ang puwersa sa Alegria team lakip na ang mga team officials niini. Hinuon daling misibat misibat ang nagbato paingon sa awa-aw nga dapit.
Duna usay mga taho nga ang Balamban Ship Builders nabiktima na usab niini. Apan niadtong tungora, ice water ang gilabay. “Duna gyuy mga badlungon dihang dapita. Tripping lang siguro ba,” dugang ni Abing. Tungod sa maong hitabo, gitinguha karon ni Abing nga butangan og mga escort ang mga visiting teams ilabi na sa mga lagyong dapit.
Ang maong torneyo nga gitumong alang sa mga grassroots level, mao karon ang gihisgutan og maayo sa tibuok probinsiya sa Sugbo sa natad sa paugnat sa kusog.
Nahimo na usab kining luna diin anhi dinhi manghagpat og mga players ang mga unibersidad dili lang dinhi sa Sugbo kon dili lakip na usab ang nagbase didto sa Kaulohan.
Nanghinaot si Abing nga unta dili masudlan og pulitika kining maong programa. (JBM)