KRITIKAL ang kahimtang karon sa usa ka lalaki human gipusil sa iyang silingan didto sa Purok Mangga, Barangay Talian, lungsod sa Maragusan, Comval Province.
Giila ang biktima nga mao si Donielo Tolentino, 30, ug molupyo sa Purok Mangga, Barangay Talian.
Ang suspek nailhan nga mao si Arnel Martinez, 34, ug molupyo sa susamang dapit.
Sumala sa report gikan sa Comval Province Police Provincial Office nasayran nga nahitabo ang pagpamusil pasado alas 9:00 sa gabii niadtong Biyernes.
Samtang nag-istoryahanay ang biktima ug ang iyang higala nga mao si Jun Ray Gutang didto gihapon sa dapit, kalit lamang nga miabot ang suspek nga armado og 12 gauge shotgun ug sa way daghang istorya gipusil niini ang biktima.
Samad pinusilan sa kalawasan ang nahiaguman sa biktima nga dali sab nga gidala sa Maragusan Municipal Hospital.
Apan gibalhin sab siya sa Davao Regional Hospital sa siyudad sa Tagum tungod sa grabeng samad nga naangkon.
Ang suspek wa na sab ka-ikyas human kini masikpaw sa mirespondeng mga otoridad.
Gitanggong na karon sulod sa selda ang suspek samtang ang kasong frustrated homicide gihikay na batok kaniya. (Marvin Pineda)