DILI lang dagat, puting bas ug labtingaw ang anaa sa isla sa Bantayan sa lalawigan sa Cebu. Aduna kini nindot nga mga simbahang Katoliko.
Anaa ang Saints Peter and Paul Parish Church sa lungsod sa Bantayan ug ang Sto. Niño Roman Catholic Parish nahimutang sa Sta. Fe.
Ang Saints Peter and Paul Parish Church sa Bantayan karaan og disenyo ang istruktura.
Natukod kini isip parokya niadtong tuig 1581 ug mao kini ang unang parokya nga natukod gawas sa Manila.
Yano ra ang portada sa San Pedro Sab Pablo, ang tawag sa mga Bantayanon sa simbahan, apan inig tikang dayon nimo pasulod, ang wayuk nga kisame ang mosugat sa imong panan-aw.
Ang kisame napuno og dibuho sa katekismo o pagtuon sa mga Sakramento--sama sa Last Supper, Koronasyon sa Birhen Maria, ang Pagbanhaw ug uban pa. Kung ang Vatican didto sa Roma adunay Sistine Chapel, ang Bantayan adunay Dibuho Kisame sa San Pedro San Pablo.
Wala pa makompleto ang Dibuho Kisame Project.
Kung moadto ka sa Bantayan, simba sa San Pedro San Pablo unya pag-selfie dayon nga makita ang tibuok kisame.
Aduna kini quick response (QR) marker nga nahimutang dapit sa entrance doors.
Ang nakanindot sa San Pedro San Pablo kay anaa kini nahimutang sa sentro sa lungsod. Duol kini sa merkado, buwaran, mga kan-anan, plaza ug commercial center sa Bantayan. Inig human nimo og simba, aduna ka pay maadtuan.
Samtang ang Sto. Niño Roman Catholic Parish, moderno ang iyang arkitektura.
Stained glass windows ug ang retablo pud ang atraksyon sa Sto. Niño.
Makita sa stained glass windows ang mga imahen sa Sto. Niño de Cebu, San Pedro Calungsod ug ubang mga inilang santos.
Ang retablo ginama sa tugas, ug ang mga parokyano mismo maoy nangita ug nagtampo-tampo aron mapanindot kini, matod sa kura nga si Fr. Roy Bucag.
“Tugas is a symbol of their unified effort in spite sa mga kalisdanan nga ilang nasinati labi na sa bagyong Yolanda,” matod ni Fr. Bucag. “Lig-on ang tugas, lig-on pud ang faith.” Mas maayo nga ikaw mismo ang makakita sa kanindot sa kining duha ka simbahan sa isla sa Bantayan. (MPS)