NAAY panghitabo sa atong kinabuhi nga usahay maingon nato nga, unta mabalik pa kadto, unta duawon pa ako sa mga masadya nako nga mga takna sa akong kagahapon, ug sa dili matuyo maubanan kini sa mga luha.
Daghan og kadramahan ang kinabuhi sa tawo, labi na og naa ta sa punto nga nasubo kita, naghandom kita sa mga tawo nga nawala na sa atong kiliran ug bisan sa panahon nga nagkaproblema kita.
Pero kining tanan giingon nga kabahin lamang kini sa pagpakabuhi sa tawo sa ibabaw ning kalibutan, -- ang panahon nga anaa kita sa kasub-anan, ug ang mga takna nga anaa kita sa kalipay.
Apan ngano man kaha nga lami man kaayong paminawon ang paghinumdom sa mga nanglabay’ng mga takna?
Sa pagtuon, ang mga batid sa natad sa Sikolohiya nagpahinumdom nga ang pag-aninaw sa mga nangagi sa kinabuhi, usa sa mga makatabang sa tawo paunsa moaginod sa unahan, makat-on kung paunsa mo-move on ug makabalo paunsa dawaton ang kapakyasan ug ang mamahimong kabag-ohan sa umaabot.
Diha ko’y higala nga mitaliwan na sa laing kalibutan, sa buhi pa kadto, magsige siya’g paambit kanako sa iyang mga kapakyasan sa kinabuhi, kining ako pod nga usahay, siaw, kataw-an lang nako iyang mga gipangsulti, ug wa nako gibali nga kadto diay, dulot sa iyang kasingkasing ang pagpaambit kanako.
Duha na katuig ang milabay sa iyang pagpanaw, nahimo niyang tapuson ang iyang kinabuhi human gibulagan sa iyang hinigugma, gumikan alang niya niadtong buhi pa siya, wala na kuno’y pulos ang iyang kinabuhi ug gikapoy na siya sa kalibutan nga wa misabot kaniya.
Gisayangan lang ko kay 17-anyos pa tawon, ug bisan paunsa pa siya ginatambagan sa iyang mga ginikanan kung unsay maayo sa kinabuhi, di gyod maminaw, kay nagtuo siya, iyahang tanang desisyon ang tama.
Sa atong paghinuktok sa mga takna, atong ibutang sa kaugalingon nga kining tanang problema lumalabay lamang, ug mingdaklit lamang kini sa atong kinabuhi.
Kung matag higayon nga atong hinumdumon ang atong mga nangagi, makaayo man kini, apan di unta kita maabot sa punto nga atoa nang kutluon atong kinabuhi, kay sayang gayod, kausa ra ang kinabuhi sa tawo, di na kini mabalik pa.
Libre ang maghandom sa unahan, way makabuot kanato, pero kinahanglan mga higala nga dunay limitasyon, kay kung masobrahan basin unya makapatuklod sa atong pagbati ngadto sa ngitngit nga dalan.
Sa kanunay, magpasalamat kita sa mga grasya nga atong nadawat, sa grasya sa kinabuhi nga sa kasamtangan nagginhawa kita, sa grasya sa pamilya nga ato silang nakauban ug sa kahigalaan nga gibati natong mga igsuon.
Hangtud sa sunod Biyernes mga higala, sa kanunay sa Diyos ang himaya ug dungog.