18 ka establisemento sakpan sa DTI, ikiha

ANG Department of Trade and Industry (DTI) sa Central Visayas mokiha batok sa lima ka mga establisemento sa Sugbo ug laing 13 sa Bohol tungod sa pagpamaligya og substandard nga mga produkto.

Si DTI-7 director, Asteria Caberte, niingon nga ilang gihugtan ang pagpatuman sa balaud kalabot sa product standards aron nakapanalipdan ang kamerkaduhan gikan sa pagpamaligyag substandard nga mga produkto nga maghatag og kakuyaw sa mga konsumidor.

“The DTI encourages our manufacturers, importers, and distributors to sell only those critical products that passed quality and safety tests. More so, the presence of the required labeling and PS and ICC marks indicates that their products are reliable and safe for use,” matod ni Caberte sa usa ka pamahayag niadtong Abril 5, Biyernes.

Kini mga kalapasan ubos sa Standards Law kun Republic Act(R) A 4109) ug Consumer Act of the Philippines (RA 7394).

Nasakmit nga mga produkto naglakip sagad sa construction materials sama sa re-rolled steel bars, ceramic tiles, GI pipes ug household appliances sama sa rice cooker, DVD player, television, smart TV ug lampholder, matod ni DTI information officer Jojisilia Villamor.

Matod ni Villamor nga ang ilang mga abogado naghikay pa sa mga kaso.

Apan di pa sila makapagawas sa mga ngan kay gidili kini ubos sa Data Privacy Law.

“Our lawyers are currently deliberating on the cases for the penalties,” siya nagkanayon.

Si Caberte nipahimangno nga ang ilang departamento padayong mogukod sa mga balay patigayon nga padayong mamaligya og uncertified, di maayo og klase ug substandard nga mga produkto.

Kining mao nga mga produkto way nakabutang nga Philippine Standard (PS) and Import Commodity Clearance (ICC) marks.

Kini nga mga produkto hayan maoy magmugna og sunog o gabok nga pundasyon sa mga balay.

Matod ni Caberte nga sumala sa R.A. 4109 kun Standards Law, gidili ang pagpamaligya sa bisan unsa nga produkto nga wa masubay sa Bureau of Product Standards (BPS) Product Certification Scheme ug gitakdang PNS quality o safety standards and tests.

Ubos sa Standards Law, ang mga mamaligua sa substandard products mag-atubang og multa nga P25,000 ngadto P150,000 samtang mga manufacturer multahan og hangtod sa P300,000 o pasirhan. (JOB sa SunStar Cebu)

Related Stories

No stories found.
SunStar Publishing Inc.
www.sunstar.com.ph