DAVAO. Gisusi sa mga maintenance personnel sa usa ka establisemento sa may dalang C.M Recto, Davao City ang atop human sige kini og katagakan og mga tipak sa semento ug usahay bakal nga nakadamyos ug nakabuslot sa atop ug power supply sa gambalay nga nakapurwesyo sa operasyon sa mga tenants sulod sa gambalay gikan sa usa ka high-rise condominium sa ilang tapad. (Macky Lim)
DAVAO. Gisusi sa mga maintenance personnel sa usa ka establisemento sa may dalang C.M Recto, Davao City ang atop human sige kini og katagakan og mga tipak sa semento ug usahay bakal nga nakadamyos ug nakabuslot sa atop ug power supply sa gambalay nga nakapurwesyo sa operasyon sa mga tenants sulod sa gambalay gikan sa usa ka high-rise condominium sa ilang tapad. (Macky Lim)

Tinumpag sa condo gireklamo

ANG tagdumala sa inilang retail center sa may CM Recto nagpadayag og kabalaka bahin sa mga mangahulog nga tinumpag gikan sa kasikbit nga condominium tower nga kasamtangang gikonstrak.

Niadtong Huwebes sa buntag, Abril 11, si Alfredo Pontillo, property leasing officer sa City Triangle Commercial Center, nagtug-an sa SunStar Davao nga ang Vivaldi Residences di motubag sa ilang tawag aron nga aksiyonan ang kahasol sa padayon nilang konstraksiyon.

Matud ni Pontillo nga mga tinumpag, naglakip sa salin nga mga puthaw, hollow blocks, gikan sa gikonstrak nga tower nagsugod sa pagpangatagak niadto pang Disyembre sa milabay nga tuig.

Matud niya nga ang isyu nahusay na sa City Engineer’s Office (CEO), kon diin ang Vivaldi naglagda og kasabutan nga nagkanayon nga responsable sila sa pag-ayo sa mga mahitabong kadaut sa konstraksiyon sa City Triangle.

Apan gikanayon ni Pontillo nga ang Vivaldi wala mag-ayo sa bag-ong mga kadaut sa ilang konstraksiyon.

“The fallen debris that damaged our rooftop had an impact on our rooftops. Tungod ani, makasinati mi og gamay’ng baha tungod sa mga buslot sa among atop,” butyag niya.

Dugang pa ni Pontillo nga apektado sab ang center’s power tungod sa impak sa nangahulog nga tinumpag, base sa assessment gikan sa Davao Light and Power Co. (DLPC).

Ang City Triangle nakuha sa Boy Scout of the Philippines (BSP) gikan sa Alsons Development and Investment Corporation niadtong 2016, nga naghimo niini nga government-owned nga propedad.

Apan una ang acquisition, gitug-an ni Pontillo nga ang gambalay nakaangkon sab og mga damyos atol sa pagkalot sa Vivaldi taliwala niadtong 2013 ug 2014.

Hinuon, matud niya nga ang maong kaso nahusay na sa City Legal Office (CLO), kon diin ang City Triangle nakadawat og kompensisyon sa mga damyos.

Apan gikanayon niya, “ang ilang gihimong retrofitting wala naka-prevent sa ongoing damages sa building. Dapat man god during the excavation period, dapat na-prevent nila ang yuta from eroding, maong ang flooring sa among salog kay murag palubog na sab.”

Gisulti ni Pontillo nga mga nag-abang, ilabi na sa fast food, nagreklamo na bahin sa sitwasiyon, hinuon wala nila nag-interes sa paghunong sa ilang rental contract.

Panagsabot gihimo sa rental payment aron nga mabayran ang mga kahasol sa sitwasiyon.

Hinuon ang board, sumala niya, mangayo og legal actions sa mga hingtungdan nga ahensiya, dugang pag-ingon nga abli siya sa ideya sa pag-lobby niini sa City Council.

Samtang si Cirinia Grace Catubig sa Office of the City Building Official (OCBO), nag-awhag sa City Triangle nga mopasaka og sinuwat nga reklamo aron nga ang buhatan makapadala og opisyal nga inspectors sa lugar.

Dugang ni Catubig nga kinahanglan ang pormal nga reklamo ngadto sa OCBO ug CEO aron nga makapatunga sa maong kahimtang.

Apan matud niya ang iyang buhatan wala makakaplag og kalapasan sa bahin sa Vivaldi tungod kay nagtuman sila sa safety nets nga gikinahanglan sa OCBO.

“Dili man god nimo ma-prevent nga bisan nagbuhat na sila’g safety nets, naa gyuy possibility na naay matagak kay malapas siya sa atong safety nets,” tin-aw ni Catubig.

Gisulayan og kuha sa Sunstar Davao ang bahin sa Vivaldi Residences bahin sa isyu, apan wala pa nitubag.

Related Stories

No stories found.
SunStar Publishing Inc.
www.sunstar.com.ph