GATUSAN ka mga pari sa Archdiocese of Cebu ang nitambong sa misa sa Krisma diin gihimo usab ang pag-renew sa panaad sa mga kaparian kagahapon, Huwebes, Abril 11 sa Cebu Metropolitan Cathedral.
Si Cebu Archbishop Jose Palma mao ang niselebrar sa maong misa.
Ang misa himuon kini sa panahon sa Huwebes Santo apan tungod sa kalagyo sa mga simbahan sa Sugbo gihimo na kini sa archdiocese usa ka semana sa wala pa ang Huwebes Santo aron daghan pang pari ang makatambong niini.
Atol sa iyang wali si Palma nipahinumdom kini sa publiko nga mamalandung sa panahon sa semana santa, “we are all reminded that we belong to God.”
Usa usab sa hangyo sa arsobispo nga unta dili mopahimulos kining mga magpapili sa umaabot nga piniliay sa mga aktibidad sa semana santa.
“Unta para nato kay Katoliko man ta hatagan nato og panahon pagpamalandong ang gugma sa Diyos nga gipakita sa iyang pagpang-antos ug pagpasakit.”
Tambag niini sa kandidato nga hangtod nisunod kini sa rules ug wala sa ilegal, mamahimo kini.
“Pero nasayod kita, nituo kita nga kining atong gipili maoy makadala ug mag-uban kanato sa dalan sa kausaban ug sa pag-uswag” tambag ni Palma sa mga botante.
Human sa wali ni Palma gibendisyonan dayon niini ang lana nga gamit sa mga pari alang sa pito ka sakramento sa Simbahang Katoliko.
Gipanghatag dayon kini sa tagsa-tagsa ka pari. (HBL)