DUHA ka lalaki ang patay sa managlahing nga insidente sa siyudad sa Sugbo kaganihang kadlawn, Abril 12.
Patay ang usa ka 42 anyos nga habal-habal driver human pusila sa duha ka wala mailhing mga armado sa dalan Sabellano, Sitio Mayupay, Barangay Quiot sa siyudad sa Sugbo ganinang ala 1:20 sa kaadlawon, Abril 12.
Ang biktima giila nga si Roland De Asis Egdamen, 42 anyos, minyu usa ka habal-habal driver nga molupyo sa Sitio Ubca 3, Barangay Quiot.
Ang Pardo Police Station nakadawat og alarma sa pagpamusil ganinang kaadlawon ug sa ilang pag responde ila nalang nakita ang biktima nga nag buy-od na sa karsada tapad sa iyang motorsiklo nga wala nay kinabuhi.
Nakaangkon og samad pinusilan sa luyong bahin sa iyang liog ug ulo si Egdamen nga maoy hinungdan sa iyang hinanali nga kamatayon.
Usa sa mga naka saksi, nga nagpaila nga pasahero sa biktima, niingon nga sa dihang naabot sila sa maong dapit gikan sa Bayanihan Village sa Barangay Basak- Pardo kalit lang naabot ang mga wala mailhing mga lalake ug dayong pamusil sa biktima.
Samtang, patay na usab nga gi respondehan sa kapulisan ang usa ka 38- anyos nga lalake nga adunay samad dinunggaban sa lawas sa Sitio Lower Carreta, Barangay Carreta, sa siyudad sa Sugbo alas 2 ganinang kaadlawon Abril 12.
Ang biktima mao si Reynard Escalla, 38- anyos, nga nagpuyo ra usab sa maong dapit.
Wala pay matumbok nga suspek sa maong krimen ug padayon pa nga nanguhag kasayuran ang kapulisan. (AYB)