LANGYAW nga lalakeng tinun-an sa kursong medisina nadakpan human giingong nanglili ug ni-video sa usa ka dalaga nga tinun-an usab sa usa ka iladong unibersidad sa Siyudad sa Sugbo samtang naligo sa banyo sa ilang giabangang apartment.
Gialarma sa mga sakop sa Abellana Police Station ang apartment sa Sitio Pailob, Barangay Sambag 2, Siyudad sa Sugbo human nireklamo ang 21 anyos nga dalaga, kinsang ngan gipugngan, nga gibuso siya ug gi videohan pa samtang siya naligo.
Matod sa dalaga nga samtang hubo siya nga naligo niadtong Huwebes sa alas 5 sa hapon, Abril 11, nakabantay siya nga adunay mata nga naglili sa usa ka lungag.
Iya kining gisusi ug siya nakurat sa dihang nag-abot ang ilang panan-aw sa usa ka lalake sa lungag. Dali siya nga nag ilis ug nigawas sa banyo ug iya pang naabtan si Noah Malken, 27, nga naghawid pa sa iyang cellphone.
Si Malken sama kaniya tinun-an sa medisina.
Matod ni Police Major Eduardo Diaz hepe sa Abellana police station, nga ang babaye nagsige na lang og hilak.
“Hangtod gabii (Huwebes) ang babaye sigeg hilak kay gi videohan siya sa foreigner samtang naligo. Mao nang ang babaye gusto siya mo-file gyud og kaso,” matod ni Sanchez.
Giangkon ni Malken nga natintal siya sa pag tan-aw sa babaye nga naligo, apan di kadto tinuyo sanglit makita man usab niya sa bintana sa banyo.
“I was tempted at that time when I saw her in an open window, which is close to my room,” matod ni Malken.
Dugang ni Malken nga una kadtong higayon nga namuso siya ug iyang gikuhaan og video samtang naligo ang dalaga.
Desidido ang dalaga nga mopasakag kaso batok sa langyaw tungod sa pagtuo nga di lang makausa siya gilili.
Nakuha sa kapulisan ang cell phone nga gituohang gigamit ni Malken sa pag-video.
Kasong kalapasan sa Republic Act 9995 o Anti-Photo and Video Voyeurism Act ang ipasaka sa biktima batok ni Malken.
Dako ang posibilidad nga maapektohan pa ang pag puyo niini dinhi sa Pilipinas.
Naabot sa Sugbo si Malkem niadtong 2017 ug mitungha siya sa usa ka unibersidad sa kursong medisina.