ANG kapulisan nanawagan sa katawhan nga motabang kanila sa pagbantay sa lihok sa mga pulis nga nalambigit sa pagpangayo og salapi nga motorista nga moagi sa ilang checkpoint.

Ang panawagan giluwatan ni Police Chief Superintendent Pedro Tango, direktor sa kapulisan sa rehiyon onse, human nasayud nga dunay mga pulis nga nalambigit sa maong anomalya.

Si Tango nagbutyag nga dili masumpo sa kapulisan ang maong suliran kung dili motabang ang katawhan.

Siya nag-awhag nga isumbong gayud ang hiwi nga binuhatan sa kapulisan sanglit dili siya buot nga dunay mga pulis sa rehiyon nga maingon nga “kotong cops.”

Niadtong miaging semana, daghang mga motorista ang nagmulo batok sa mga pulis nga nag-check point sa Toril ug Los Amigos gumikan kay nangayo kanila og salapi panahon nga moagi sila sa maong checkpoint.

Suma sa mga drayber nga mohatag sila og salapi sa mga pulis sa Highway Patrol Group (HPG) aron dili na mabalda ang ilang biyahe paingon dinhi sa siyudad.

Apan, dihang gipakisayran ang mga pulis nga nadestino sa maong mga check point, sila nagbutyag nga walay kamatuoran ang pasangil sa mga drayber. (AD)