NAGBANGUTAN ang running community sa Sugbo sa kalit nga kamatayon sa marathon champion sa Pilipinas ug Southeast Asian (Sea) Games bet Rafael Poliquit Jr., kinsa lumad nga taga Tagum City.
Si Poliquit, kinsa three-time Milo Marathon national champion ug Airman 2nd Class, mipanaw niadtong Abril 11 sa alas 2:21 sa hapon gumikan sa komplikasyon sa sakit nga subdural emphysema. Nag-edad siya og 30 anyos.
Ang runner ug triathlete Jezerel Baguio, kinsa usa sa labing suod nga higala ni Poliquit dinhi sa Sugbo, mibalik lantaw sa kamaayong tawo ug pagkamanggihatagon ni Poliquit.
Gipasabot ni Baguio nga kanunay sab motabang si Poliquit sa training programs sa iyang kaubang runners.
Si Baguio hasta ang sumosulbong nga runner nga si Jonel Emia duha lang sa natabangan ni Poliquit sa ilang training programs.
Si six-time reigning Milo Marathon queen Mary Joy Tabal, kinsa gikadungan ni Poliquit sa duha ka international events, mibuhi sab alang kang Poliquit.
“Let’s bring this smile in heaven, Pol (Poliquit), continue to run your eternal marathon. You will always be my marathon king, our marathon king. You will be in our hearts. Rest in peace master endurance,” caption ni Tabal sa iyang gi-post nga hulagway diin nag-uban sila ni Poliquit.
Ang usa sa nag-unang runners sa Sugbo nga si Prince Joey Lee mihisgot kabahin sa kamanggihatagon ni Poliquit.
Matod ni Lee nga dihang midaog si Poliquit og P60,000 sa SM2SM Run, gilibrahan niini ang iyang mga higala ug igo na lang kining nakalimpyo og P36,000. (RSC, ESL)