MIKOTKOT ang kagaw sa politika nga maoy nagtukmod nila Gov. Junjun Davide ug Vice Gov. Agnes Magpale pagsang-at og kaso batok ni Rep. Gwen Garcia sa 2013 kabahin sa pagtam-ok og anapog sa nahulpa nga luna sa Balili sa pasangil nga walay gahin nga gitugot sa hunta probinsyal. Kadaling nalimot ni Magpale nga duna pay nahibiling P50 milyones alang sa Airport, Seaport ug Economic Enterprize Site Development Program nga nalakip sa ilang giaprobahan nga annual budget.
Titulado ang maong luna nga fishpond kaniadto apan nasudlan og dagat kay wala matagad sa magtiayong Balili nga gipalit sa kapitolyo nga barato sa tag 400 pesos matag metro kwadrado. Maong gipaabunohan sa ABF Construction.
Si Magpale nga usa sa mihatag og authority ni Garcia sa pagpalit sa Balili property wala na moangkon human mobali sa Liberal Party. Nanglipaghong sa dihang gipasaksi sa Sandiganbayan nga gipakita sa iyang pirma. Sa maong kaso si Ombudsman Conchita Carpio-Morales nga tawo ni Pres. Noynoy Aquino mihukom sa dismissal ni Garcia. Apan dili pa final and executory kay naa pa ang maong kaso sa Court of Appeals. Hukom ni Morales tataw nga nakaangkla sa iyang kasuko gumikan kay si Garcia aktibo sa partisipasyon sa impeachment batok ni Morales sa kalapasan politikal, selective justice, betrayed the public trust ug conspiracy pagpalagpot ni Duterte.
Sigig solsol usab si Justice Davide Jr. nga amahan ni Junjun kay suod man sila sa judiciary. Wala motahod sa maong dismissal sila House Speaker Pantaleon Alvarez ug Gloria Arroyo kay sa Sec. 21 sa Ombudsman Act of 1989 (RA 6770) naglatid nga walay katungod ang Ombudsman sa pagdisiplina sa mga sakop sa kongreso.
Naabswelto usab si Garcia sa kasong administratiba nga gisang-at ni Cris Saavedra gumikan sa Aguinaldo Doctrine o Doctrine of Condonation human mapili pag-usab. Ang kasong kriminal pending pa sa Sandiganbayan.
Human sa pagsang-at og Certificate of Candidacy (COC) laing kagaw sa politika mikamang. Sila Atty. Edgar Gica ug Norma Pilapil Puzon misang-at og petisyon sa Comelec sa pagkanselar sa COC ni Garcia nga mobalik pagka-gobernador.
Iwit sa inpormasyon si Gica nga mikuyog sa fake news kay ang perpetual disqualification ni Garcia nga gipagawas sa Disyembre 9, 2017 dili final and executory kay pending pa sa Court of Appeals. Pebrero 2019 gibasura sa Comelec ang duha ka kasong disqualification batok ni Garcia kay walay basihanan ang pagkanselar sa COC. Giyam-iran sa Comelec ang petisyon nila ni Gica ug Puzon. (csa-1156@yahoo.com/09064648954)