DUL-an sa 4,000 ka ballot boxes nga gamiton sa nagsingabot nga piniliay sa Mayo 13 sa mga lungsod ug mga siyudad sa lalawigan sa Sugbo ang naabot na sa Sugbo niadtong Huwebes, Abril 11.
Si acting Cebu Provincial Election Supervisor Atty. Jerome Brillantes nibutyag nga 12 ka 40 ft. nga container van ang gisudlan sa mga ballot box nga gibiyahe sa LBC Express, Inc. gikan sa kaulohan.
Sumala niini, ang bag-ong ballot boxes naa gipundo sa bodega sa Commission on Elections (Comelec) sa dakbayan sa Mandaue.
Ang Comelec nagpalit og bag-ong ballot boxes tungod kay ang daan nga mga kahon nga gigamit sa miaging 2016 nga presidential elections ang wala gipagamit sa Presidential Electoral Tribunal gumikan electoral protest ni kanhi Sen. Ferdinand “Bongbong” Marcos batok Bise Presidente Leni Robredo.
Matod ni Atty. Ferdinand Gujilde, acting Danao City election officer, matag clustered precinct dunay usa ka ballot box.
Moabot sa 3,716 ang clustered precincts sa Sugbo, apil ang 759 sa dakbayan sa Sugbo ug 234 sa siyudad sa Lapu-Lapu, highly urbanized cities ug dili sakop sa lalawigan.
Ang puti nga ballot box nga susama og hitsura sa labayanan og basura, maoy patungan sa vote counting machine (VCM) nga sudlan sa balota human og botar. (SCG)