ADUNA na’y 10 ka unit sa Ceres Bus ang nikuha og special permit aron makabiyahe kini gawas sa ilang prangkisa karong umaabot Semana Santa.
Matod ni Land Transportation Franchising and Regulatory Board (LTFRB) 7 Regional Director Eduardo Montealto Jr. nga sagad niini nga biyahe paingon sa Habagatan.
Ang special permit kuhaon kini sa usa ka operator aron makabiyahe ang pampubliko nga sakyanan gawas sa franchise area aron paghatag og igong masakyan hilabi na nga daghan ang manguliay sunod semana alang sa holy week.
Nasayran nga niabot sa 85 ka special permits ang na-isyu sa maong ahensiya niadtong semana santa sa 2018.
Dugang ni Montealto nga sa buhatan nila sa LTFRB 7 molukat sa maong permit aron masuta usab ang prangkisa niini.
Subay gihapon sa semana santa, nagsugod na ang LTFRB 7 sa pagpang-inspect sa mga bus aron masiguro nga luwas kini nga mobiyahe.
Nagsugod ang ilang inpeksyon niadtong Abril 5.
Ubos sa Joint Adminsitrative Order (JAO) 2014-01, moabot sa P1 milyon ang multa sa madakpan nga mokulorom o kining mobiyahe nga magpabayad nga wala’y prangkisa o special permit. (HBL)