PORMAL nang gibuksan sa miaging Huwebes sa gabii, Abril 11, ang tinuig nga Food Festival sa bag-o lang gi-renovate nga Liberty Shrine sa Barangay Mactan, dakbayan sa Lapu-Lapu.
Ang kalihukan anaa na sa ika-13 ka tuig nga nagsilbing usa sa mga kalihukan sa makasaysayanong tinuig nga “Kadaugan sa Mactan” nga saulogon sa Abril 27.
Moabot sa 65 ka food stalls ang pormal na usab nga naninda sa Liberty Shrine sugod sa Abril 11 sa gabii.
Aduna pay moapas sa mosunod mga adlaw pagbutyag sa tourism officer sa Lapu-Lapu nga si Hembler Menodza.
Karon tuiga mas lapad na ang hawanan sa Liberty Shrine nga gitindahan sa mga food stalls sanglit mokabat na sa 1.2 ektarya sa luna sa shrine ang nagamit nunot sa pag renovate sa naasoyng lugar itandi sa miaging mga katuigan.
Gawas sa mga hotel, resorts ug ubang patigayon sa dakbayan sa Lapu-Lapu adunay food stalls nga miapil sa kalihukan nga gikan sa silingang mga dakbayan ug lungsod sama sa Cordova ug dakbayan sa Sugbo.
Alas 5:30 sa hapon hangtod sa alas 10 sa gabii gikatakdang magsugod og paninda ang mga food stalls sa Liberty Shrine sa ubos nga presyo gikan sa P5 hangtod na sa P99 depende sa mga potahe.
Molanat ang food festival hangtod sa Abril 30 apan wala lang unay maninda sa Abril 18, 19 ug 20 isip pag-obserbar sa Semana Santa.
“From the beginning when I started this it is about the celebration of our hero as well as the unity of all tourism stakeholders,” matod ni Mendoza.
Si Senator Cynthia Villar, kinsa pinasidunggang dinapit sa kalihukan, nidayeg sa mga kalihukan sanglit usa kini ka maayong paagi sa pag-promote sa turismo sa dakbayan.
“Maganda to kasi dalawa ang nagagawa na de-develop ang tourism and at the same time nakakatulong sa mga magsasaka at mangingisda kasi siyempre pag-food eh di galing sa ‘yan sa trabaho ng magsasaka at mangingisda,” matod ni Villar. (GCM)