SUPERBALITA CEBU

Mama ni Christine wa mopirma sa affidavit; kaso wa ma-file

NABALHUG NA: Si Renato Llenes (tuo) gibalhug na sa Lapu-Lapu City Police detention cell, diin iyang giasoy giunsa niya pagpanguyab si Christine Lee Silawan. (Flor V. Querubin)

BIYERNES, Abril 12, unta ipasaka ang kaso batok kang Renato Llenes, niangkong killer ni Christine Silawan.

Andam na unta ang tanan, apan tungod sa wa pagpirma ni Lourdes Silawan, inahan sa dalaga, sa usa ka affidavit, wa mahinayon ang pagduso sa kaso ngadto sa Lapu-Lapu City Prosecutor’s Office.

Gibutyag ni Police Regional Office (PRO) 7 chief Police Brigadier General Debold Sinas, kinsa niduaw sa Lapu-Lapu City Police Office kagahapon, Abril 12, nga adunay kondisyon si Lourdes sa di pa siya mopirma sa maong dukomento.

Kini ang iyang mga kondisyon: ilakip ang 18-anyos nga suspek sa pagkiha ug kasong rape ilakip sa pagduso.

Ang Public Attorney’s Office (PAO) nihinabi ni Lourdes aron sa pagpapirma unta sa affidavit nga usa sa mga gikinahanglang dokomento sa pagsang-at og reklamo.

Apan nibalibad ang inahan kay ipaapil ang ngalan sa 18 anyos nga ex-boyfriend ni Christine, 16, nga unang gidakop sa National Bureau of Investigation (NBI).

Ipalakip sab ni Lourdes sa kaso ang pagpanglugos nga misukwahi sa gikumpisal ni Llenes ingon man sa autopsy report sa PNP Crime Laboratory.

“Gusto niya (Lourdes) i-uban sa kaso kadtong boyfriend, we could not, kasi wala gyud ebidensiya didto. Ikaduha, gusto gyud niya nga naay rape, but sa testimony (Llenes) nga walay rape... but we agreed with the PAO to have a separate filing nga attempted rape,” pasabot ni Sinas ngadto sa mga tigbalita.

Paningkamutan sa kapulisan nga makumbinser ang kabanay sa biktima sa pagpirma sa affidavit pinaagi unya sa pagpresentar ngadto kanila sa tanang nahipos nga mga ebidensiya.

“I believe and we (police) believe and the Chief PNP believe that we have a very strong case,” dugang pa ni Sinas.

Samtang si Police Colonel Limuel Obon, hepe sa Lapu-Lapu City Police OIffice nipakita sa tanang ebidensiya nga ilang nahipos.

Naglakip kini sa mga kuha sa CCTV camera sa dapit diin katapusang nakit-an si Christine, t-shirt, gunting, cellular phone, affidavit sa mga saksi, re-enactment uban sa PAO ug abogado ug ang affidavit sa suspek sa iyang pag-angkon sa krimen.

Kuhaan unta sa iyang habig si Lourdes, apan sukad madakop si Llenes, nagdumili na kini sa pagluwat og pamahayag. Gikataho nga wa na kini sa ilang balay kay giingon nga nibakasyon.

Hinuon, si Fermina-Silawan Garcia, iyaan ni Christine, niangkon nga naglibog na sila ning pagkasikop ni Llenes, apan nangindahay nga makab-ot ang hustisya sa kamatayon sa iyang pag-umangkon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph