LOVE triangle usa sa gitan-aw nga motibo sa pagpusil sa upat ka mga staff sa usa ka coffee shop sa Barangay Cogon Ramos, Siyudad sa Sugbo niadtong gabii sa Abril 10.
Matod ni Police Major Eduardo Sanchez, hepe sa Abellana Police Station, ilang gisubay ang personal nga anggulo sa pagpamusil.
Nakalas sa pagpamusil ang managing owner sa The Good Cup Coffee Shop nga si John Michael Hermoso, 29, ug si Kis Ramos, cashier sa coffee shop.
Aduna na silay mga persons of interest nga gitan-aw sa pagkakaron.
Nakadawat og impormasyon ang kapulisan nga si Hermoso adunay tulo ka mga hinigugma nga posibling usa sa hinungdan niini.
Mohimo silag background investigation ilabi na sa aspeto sa gugma.
“Mao ni atong gisubay ang love triangle ni Michael, kon unsay dagan sa kinabuhi ni Michael mahitungod sa gugma ba. Unsay hinungdan nganong grabe ang kasuko sa suspek,” matod ni Sanchez.
Sa kuha sa CCTV camera sa gawas sa coffee shop, makita ang duha ka lalake, diin usa ani trabahante nga adunay gipaabot.
Pipila ka sigundo, niabot ang usa ka wala mailhing lalake nga naka fullface helmet ug dayong pamusil sa mga tawo nga naa sa sulod.
Human sa pagpamusil, nagbilin pa kinig lata nga adunay migawas nga aso aron di masundan sa mga tawo ug yano nga nagbaktas paingon sa naghuwat nga motorsiklo.
Makita nga walhon ang gunman ug mabantayan nga maayo mogamit sa armas tungod sa kapaspas sa pagpamusil ug usa lang ka kamot ang gigamit.
“Professional gun holder ni kay kon bag-o pa lang, syempre kuyawan ka. Pero siya pulos igo ang unom ka bala. Si Michael duha katong kang Ramos duha. Katong (Sherwin Rivera ug (Jerome) Amada, tag usa-usa,” dugang ni Sanchez.
Si Hermoso nakaangkon og duha ka pinusilan sa lawas diin daghang mga internal organs ang nangaigo.
Si Ramos nakaangkon og samad sa luyong sa ulo nga milapos sa agtang ug lawas.
Sulbara: Garganera
Giawhag sa chairman sa police advisory council (PAC) ang Cebu City Police Office (CCPO) sa pagsulbad ug pagdakop sa nagpusil patay sa tag-iya ug kawani sa coffee shop.
Si Konsehal Joel Garganera nikondena sa hitabo sanglit ang usa nga namatay graduating student ug tag-iya sa coffee shop nga mosalmot pa unta sa usa ka world competition sa coffee making isip pambato sa nasod.
“I am condemning the blatant acts of murder committed in Good Cup Coffee Company in barangay Cogon Ramos and requesting CCPO to expedite the investigation and apprehend the perpetrators,” padayag ni Garganera sa Superbalita Cebu. (AYB & PAC)