BANSALAN, Davao del Sur -- Hingpit nang gipatuman sa Department of Interior and Local Government (DILG) ang mando sa Ombudsman nga isuspende si Mayor Quilin Sarte, Huwebes, Abril 11.
Samtang gimandoan sab sa DILG si Vice Mayor Edwin Reyes nga maoy mohulip isip acting mayor.
Ang mayor mismo ang nilagda sa kamandoan sa DILG subay sa direktiba sa Ombudsman nga masuspende siya sud sa unom ka bulan tungod sa kasong graft and corruption.
Ang kaso sa mayor nanukad human gireklamo ni kanhi Konsehal Eddie Telmo sa giingong ilegal nga gipagamit niini ABC Gymnasium ngadto sa usa ka pribadong organisasyon nga way abang apan nagpapulta sa duwang basketball.
Apan ang mayor nagbutyag nga “politically motivated” ang pagsang-at og kaso batok kaniya human nakakita ang iyang kampo og iregularidad sa joint resolution sa Ombudsman.
Human gilagdaan ni Sarte ang order, nibalik siya pagsud sa iyang buhatan kagahapon sa buntag ug gikuyogan pa ni Governor Douglas Cagas.
Aron di magka-tensiyon, ang mga supporters ni Sarte ug Reyes, didto na lang nag-opisina si Reyes sa iyang buhatan sa Sangguniang Bayan ug gipakalma ang iyang sakop.
Si Reyes ug Sarte magkaalyado sa miaging eleksiyon apan nag-kontra karon sa pagka-mayor. (Orlando B. Dinoy)