MISAAD si Philippine National Police (PNP) chief Oscar Albayalde nga andam siya mohatag og ayuda sa mga police sa Central Visayas kung pasakaan silag kaso nunot sa pagkamatay sa 14 ka mga tawo sa Negros Oriental atol sa pag serve nila ug search warrant.
Matod ni Albayalde nga hatagan nilag legal assistance ang mga police sa Negros Oriental lakip na ang Police Regional Office 7 nga milusad sa lapad nga Oplan Sauron sa maong probinsya nga mikalas sa 14 ka mga tawo nga giingung mga supporters sa New People’s Army (NPA).
Sa pagkakaron wala pay gipasaka nga kasong kriminal batok sa mga pulis nga nalambigit sa Oplan Sauron sa Negros Oriental.
Matod pa ni Albayalde nga gigamit lang sa mga progresibong grupo ang nahitabo sa Negros Oriental isip propaganda alang sa ilang personal nga interest.
“Sabi ko nga propaganda yan eh basta may masabi lang ang isa dyan. They took advantage of anything dito for their own advantage sana wag mabulag yung ating mga kababayan, ito yung sinasabi natin,” sigon sa pamahayag ni Albayalde.
Ang Internal Affairs Service (IAS) ug ang Investigation and Detective Management Branch (IDMB) sa Camp Crame nagsugod na sa ilang imbestigasyon labot sa maong hitabo.
Pasabot ni Albayalde nga ang pagpa relibo sa mga opisyal sa Negros Oriental Police Office (NOrPO) kabahin kini sa proseso ug aron dili mabalda ang gihimong pakisusi.
Wala matod pa kini magpasabot nga gihukman na sila ug kung masuta nga nasubay sa procedure ang ilang operation, ibalik sila sa ilang naandan nga pwesto.
Niadtong miaging semana mimando si Albayalde pag balhin sa mga gipang relibohan sa Regional Holding Accounting Unit sa PRO-7 samtang nagpadayon ang imbestigasyon.
Sa panawagan sa mga militanteng pundok nga hunongon na sa kapulisan ang mga operation sama sa gihimo sa PRO-7, wala motugot niini si Albayalde.
“They're anti-progress nga eh. Gumagawa tayo ng mga farm-to-market roads, sinusunog nila kahit yung mga heavy equipment. Is that progressive? I don't think so. Kawawa dito ang taong bayan. Kawawa ang mga kababayan natin lalo na ang mga kababayan natin sa far flung areas," dugang ni Albayalde.
Una nang mialigar ang mga militanteng pundok sa Central Visayas nga gi-massacre sa mga police ug sundalo ang mga mag-uuma sa Negros Oriental nga miresulta sa kamatayon sa 14 ka mga tawo nga hugot nga gihimakak sa kapulisan.