GISUGO lang sa inahan ang usa ka 15 anyos sa pagpamaligya og ilegal nga druga kini human nasikop niadtong Abril 11 sa J.R Borja extension, Barangay 36, dakbayan sa Cagayan de Oro.
Ang 15 anyos nga lalaki residente sa Sugbongcogon, Tagoloan, Misamis Oriental kinsa nakuhaan og anaa sa mga 50 ka gramo nga ginadili nga druga ug gibanabanang mokantidad og P250 mil. Nakuha usab gikan niini ang P5 mil nga kantidad sa buy-bust money.
Sa nahipos nga impormasiyon gikan sa Philippine Drug Enforcement Agency (PDEA)-Northern Mindanao, giingong nakurat sila dihang batan-on ang nakipag-transak.
“Pag-adto namo sa area, ang niabot nga naghatag og item kay bata man menor de edad, kana gyud ang modus nila karon suguon nila ang bata kay di man mabilanggo ang bata karon,” matud ni PSI Jojo Balanci, Special Operations Unit 6 sa PNP Drug Enforcement Group.
Sa gihimo nga imbestigasyon sa awtoridad, gibutyag sa batan-on nga iyang inahan ang nagsugo kaniya.
“Sa iyahang estorya sa amoa, iyang inahan daw ang nagsugo sa iyaha pero wala pa ta kabalo kung iyang inahan gyud niya ang nagsugo sa iyaha,” dugang niini.
Kasamtangang gikustodiya karon sa hingtungdan nga ahensiya ang menor de edad ug anaa na usab sa crime laboratory ang nakuhang dakong kantidad sa gituohang shabu.