NAKAPANGUTANA ko niini dihang nabasa nako ang balita nga dunay gibirahan sud sa usa ka coffee shop diha sa dalan Ramos sa Syudad sa Sugbo sa wa pay tunga-tunga sa gabii sa miaging Miyerkules.
Duha ang nangamatay samtang duha sab ang nangaangol.
Alang kanako, layo ra kaayo kining mga coffee shops sa mga pinusilay atol og ronda batok sa gidiling drugas diha sa mga komunidad. Layo ra sab kini sa mga giingong political violence.
Kon duna may kagubot atol sa kagabhiun, dako ang posibilidad nga mahitabo kini sa mga imnanan.
Ang mga coffee shops maoy teritoryo sa tinun-an nga magtuon (di masud ang tanan sa Cebu City Pubic Library), kining mga millennials nga mag-chill-chill, ug kining ni-pass una sa beer ug nag-coffee na lang.
Apan dunay riding-in-tandem nga nibutho og kalit sa The Good Cup Coffee diha sa dalan Ramos ug namusil sa barista ug tulo ka mga kauban.
Dali kaayong naalarma ang coffee community sa Metro Cebu kay ilado man diay kini sa ilang sector si John Michael Hermoso kay siya ang 2019 Philippine champion sa World Brewers Cup. Gitakda siyang molarga na unta aron mosalmot sa World Brewers Cup sa Boston, Estados Unidos.
Nawad-an ang Sugbo og usa ka batan-on nga naghatag kanato og garbo.
Ambot sab niining pipila ka mga pulis. Hilas kaayong moingon nga namatay si Hermoso ug nakaangin sa iyang mga kauban kay subra ka mahiligon og babaye. Mura sab og di mga hilig og chix, ay.
Ang punto nako kay di man angayang patyon bisan kinsa.
Namatay sab sa maong hitabo si Kis Tryvl Ramos, usa ka Cebu City scholar. Gani, kanhi presidente sa mga scholars. Gawas pa, kining only child kay naninguha makatabang sa iyang ginikanan isip working student, student leader ug student journalist sa University of the Philippines (UP) Cebu.
Naangol sab ang laing duha ka batan-ong lalaki nga sila si Jerome Amada ug Sherwin Rivera, laing working student ug student leader sa University of San Jose Recoletus (U-SJR).
Samtang nakadayeg ko sa performance sa kapulisan batok sa gidiling drugas dinhi sa Sugbo, nidaghan sab ang mga patay nga walay klarong kasulbaran.
Gani, hangtod karon, wa pa magkasinabot ang kapulisan ug ang National Bureau of Investigation (NBI) kon si kinsa gyud ang nipatay kang Christine Silawan.
Dayon, nagsugod kining makadudahang mga lakang sa kapulisan nga nasabot nato nga duna silay gidapigan sa politika.
Manghinaot na lang ko nga paspas nga masulbad kining coffee shop shooting. Sa pagkakaron, daw makatuo na kita sa giingong impunity. Libre na kaayo ang mga criminal nga mopatay dinhi sa Sugbo. Daw di na kita luwas nga magsuroy-suroy sa syudad.
@anol_cebu sa Twitter