ALANG sa daghang mga kabos, ang kareton maoy ilang labing bililhong kabtangan. Diha sa ilang giduso anaa na ang ilang higdaanan, pipila ka sapot, ug uban pang butang. Diha sila mangaon. Diha pod sila mopahulay. Mao na kini ang ilang panimalay. Timailhan kini sa kapit-os sa ilang kinabuhi.
Dili kareton hinunoa nating asno ang gisakyan ni Jesus pagsulod niya sa Jerusalem. Hinuwaman kini sa usa ka disipulo ni Jesus nga morag gisabot na daan. Gihapinan ang asno og mga kupô sa mga kauban ni Jesus “ug samtang milabay siya, gipanglatag nila ang ilang mga kupô diha sa dalan”. Ang kupô maoy labing bililhong kabtangan sa mga kabos sa panahon ni Jesus. Mao man god kini ang sapot nga mohatag og kainit ilabina sa gabiing bugnaw. Katulganan sad kini. Gani gidili ang pagkupot sa kupô isip prenda nga magabhian.
Sa paglatag sa mga tawo sa ilang kupô sa dalan, giila nila nga si Jesus usa ka hari. “Dalayegon ang Hari nga nagaanhi sa ngalan sa Ginoo; didto sa langit kadait ug himaya didto sa kahitas-an,” misinggit sila. Gipalanog nila ang awit sa mga anghel sa pagkatawo ni Jesus: “Himaya sa Dios sa kahitas-an, ug sa yuta kadait sa mga tawo nga iyang gikahimut-an”. Niining tungora makita nato nga ang bata nga natawo sa pasungan nagpabiling yano. Hari siya nga nagsakay sa asno ug ang iyang korona pagadawaton sa iyang pag-antos ug pagkabanhaw.
Ang pagkahari ni Jesus gipalutaw pa gayod sa nag-una ug nagsunod nga basahon sa atong ebanghelyo karon sa maong kapitulo ni Lucas. Ang nag-una mao ang sambingay sa napulo nga bulawan nga sinsilyo. Mahitungod kini sa usa ka tawo nga harianon ug kaliwat nga nagbilin og kuwarta sa iyang mga ulipon samtang siya mipanaw. Nangita siyag husay pagbalik niya. Naglagot siya sa ulipon nga wala mopatigayon sa kuwarta tungod sa kahadlok nga masayop. Dako diay tag tulobagon kon wala nato gamita alang sa kaayohan ang gasa sa Dios.
Ang misunod mao ang pagbangotan ni Jesus alang sa Jerusalen. Sa pagkakita ni Jesus sa pagtig-a sa kasingkasing sa iyang katawhan sa Jerusalen, mihilak siya ug miingon: “Kon unta nakahibalo ka pa lamang niining adlawa unsay mga butang alang sa kalinaw – apan sa pagkakaron natago kini gikan sa imong mga mata”. Dili man god mamugos ang maong hari. Timailhan kini sa iyang pagpaubos.
Karong adlawa Dominggo sa Lukay. Sinugdanan kini sa Semana Santa, ang labing balaang semana sa tibuok tuig. Daghan kitag mga maanindot nga bulohatong relihiyoso, sama sa Bisita Iglesya, mga estasyon sa krus, pagpaminaw sa Siete Palabras, ug uban pa. Hinaot kining tanan makapahinuklog kanato sa pagpaubos sa atong Langitnong Hari. Dili pa dugay, mihalok si Papa Francisco sa tiil sa mga kadagkoan sa Sudan. Gisunod niya ang pagpaubos ni Jesus. Maantigo ba kitang magpaubos?