DI IKALIMOD nga hugot ang pagpatuman karon sa siyudad sa Davao sa mga balaod trapiko.
Ang City Transport and Traffic Management Office (CTTMO) maoy gitahasan nga mopatuman niini sa dakbayan.
Mga tawo di na puwedeng bisan asa na lang motabok, kay kinahanglan nga gamiton ang mga pedestrian lanes o kaha mga overpass aron nga di dakpon.
Samtang sa mga sakyanan, kinahanglan nga mohunong sa mga lugar nga gilatid daplin sa mga kadalanan. Ilabi na gyud sa mga publikong dyip nga mopasakay ug mopakanaug og pasahero sa mga yellow boxes sa kadalanan.
Mas labaw nang di mahimong moparking sa bisan asa nga mga lugar, kay naa gyuy mga gilatid sab nga dapit alang sa pagparking og mga sakyanan.
Ang di motuman niini, seguradong dakop ang abuton.
Apan namatikdan nga daghan gihapon ang nagasupak niini nga mga balaod dinhi sa siyudad.
Ug ang nakapait pa gyud kay bisan gani ang mga personahe sa CTTMO ug sa Highway Patrol Group (HPG), maoy misupak niini.
Naay mga motorsiklo sa taga CTTMO ug HPG nga giparking daplin sa dalan samtang magbantay sa dagan sa trapiko.
Niadtong Biyernes sa hapon, dunay sakop sa CTTMO nga nagsakay og motor nga mi-turn left sa may kanto sa mga dalang San Pedro ug Quirino nga gidili ang paghimo niini.
Ang maong hitabo, tataw kaayong kalapasan sa balaod trapiko. Apan kay sila man ang tigpatuman sa balaod, way mobadlong nila?
Kanang kanto sab sa dalang Sandawa, dunay mga sakop sa HPG usahay nga moabag sa CTTMO sa pagbantay sa trapiko, apan ang ilang mga motorsiklo naa sa kanto sa daplin sa dalan i-parking.
Mao ning giingong nga sila ang tigpatuman sa balaod, apan sila ang numero unong tiglubag sa balaod.
Kay segurado ta, nga kon lain ang moparking niining mga lugara, dakop ang abuton sa mga drayber.
Kon tinguha sa CTTMO ug HPG nga pasundon ang mga motorista sa balaod trapiko, kinahanglan nga ang tigpatuman mismo sa balaod maoy manguna sa pagsunod niini, aron nga mahimong ehemplo.
Kon nagsunod mismo ang tigpatuman, seguradong mosunod sab ang yanong drayber sa balaod.
Kay bisan og traffic enforcers o pulis, o bisan kinsang mga opisyal, di man intawon exempted sa balaod. Mas kinahanglan pa gani nga sila mismo ang unang mosunod niini.
Kay sa giingon na, “No one is above the law.”