COMPOSTELA VALLEY PROVINCE -- Tungod gusto sa Commission on Elections (Comelec) nga masilutan ang mga kandidato nga pataka og pamutang sa ilang mga campaign paraphernalia, ang Comelec-Davao mipahigayon og Oplan Baklas niadtong Biyernes, Abril 12.
Uban sa kapulisan, gipangtanggal ang mga posters sa mga kandidato nga wala nabutang sa mga common poster areas ug ang mga posters nga nakasupak sa husto nga gidak-on.
Segun ni Comval provincial election officer Atty. Maria Fevis Barlaan, dunay pagatubagon subay sa balaud sa Omnibus Election Code ang mga kandidato nga pataka og butang sa ilang mga posters.
Gipanglista sa Comelec ang mga kandidato nga nakalapas sa balaud nga posibleng ilang kasohan human sa eleksyon.
Sanglit pipila ka semana nalang ang nahibilin sa campaign period, tambag sa Comelec nga sundon gayod ang husto nga pagpahimutang sa mga posters ug ang gidak-on niini aron di kini masayang ug di mag-atubang og kaso ang mga kandidato. (Richy F. Nalagon)