Biyahe pa Samal, gipahunong

DAVAO. Usa sa mga boat liners nga nagalawig, Davao-Talicud Island, via Kaputian District, sila ang usa sa mga mituman sa mandu sa lokal nga kagamhanan sa Davao City nga pakuhaon og Mayor’s permit sa Business Bureau aron makapadayon sa pagbiyahe gikan sa dakbayan padung sa Isla. (Macky Lim)
DAVAO. Usa sa mga boat liners nga nagalawig, Davao-Talicud Island, via Kaputian District, sila ang usa sa mga mituman sa mandu sa lokal nga kagamhanan sa Davao City nga pakuhaon og Mayor’s permit sa Business Bureau aron makapadayon sa pagbiyahe gikan sa dakbayan padung sa Isla. (Macky Lim)

TEMPORARYONG wa gitugtan sa Philippine Coast Guard (PCG-Davao) ang mga bangka alang sa Island Hopping gikan sa Davao City padung Island Garden City of Samal (Igacos) sanglit wala kini mga lisensya.

Sugod adlaw’ng Biyernes, Abril 12, wala gitugtan sa PCG-Davao ang kapin 50 ka mga bangka nga nagakarga og pasahero ug mga turista padulong Igacos gumikan wala sila’y mga Mayor’s permit sa lokal nga kagamhanan sa Davao City.

Ang Davao City Business Bureau hugot nga nagmandu sa PCG-Davao nga “No Permit, No Sailing” policy aron makakuha gayod og permit ang mga hintungdan.

Segun ni PCG-Davao, station commander George Maganto, nga di gayud nila tugtan nga makalawig sa kadagatan kung walay permit, butang nga ilang gi-monitor ang unom ka boat liners ug 49 ka chartered boats.

Subay sa City Ordinance 0231-14 kon “The Ordinance Amending the Tourism Code of Davao” dapat mukuha og Mayor’s permit sa Business Bureau ug lisensya sa City Tourism Operations Office ang mga tourist water transport vehicles.

Gibutyag ni Neil Michael Galaura, ang licensing officer sa Business Bureau, nga duna sila’y na-monitor nga 25 ka mga chartered boat operators nga walay permit.

“The mayor - Mayor Sara Duterte, even promised them that they will not be paying business tax since they already have permits from Marina. They just have to pay the mayor’s permit, regulatory fees, and other minimal fees,” ingon ni Galaura.

Bisan pa og ang pipila sa mga operators dunay gikapakita nga mga permits gikan sa Igacos apan suma sa opisyal nga di kini bastante gumikan sa Davao City sila nagpahigayon sa ilang negusyo.

“Since they pick up passengers here for their island hopping, they also need to pay our regulatory fees,” butyag sa opisyal.

Gipanganti sa PCG-Davao nga di gayud makalawig ang mga bangka sa island hopping, gawas kung makapakita na sila sa mga rekisitos nga gipangayo sa LGU-Davao kanila.

Pipila ka mga operator’s naneguro nga adlaw’ng Lunes, Abril 15, makakuha na sila og Mayor’s permit sa Davao City aron ilang maserbisyohan ang ilang mga pasahero nga daan nang naka-booking kanila alang sa Holy Week patabok sa Isla.

Sa pagsuwat ning balita, dunay mga boat liners padung sa Talicud Island via Kaputian District ang mibiyahe human ilang napakita ang ilang mga Mayor’s permit, apan daghan og mga chartered boat alang sa island hopping ang wala nakabiyahe.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph