NILUWAT og mando si Cebu City Mayor Tomas Osmeña alang kang Cebu City police director Police Col. Royina Garma nga di pasul-ubon og maskara ang mga pulis nga nangapil sa usa ka police operation.
Matod ni Osmeña nga ang pagtaptap sa mga pulis atol sa ilang operation maghimong illegitimate niini.
Mismo si PNP Director General Oscar Albayalde niingon nga ilang dawaton ang memorandum, apan di nila ipatuman ang kamandoan. Nipasabot si Albayalde nga ila kining gibuhat kay dunay mga pulis nga kinahanglan magtabon sa ilang mga nawong, sama sa intelligence, aron di mailhan.
Sakto ang katarungan ni Albayalde. Kinsa bang pulis nga naa sa field operation kanunay nga gustong mailhan sa ilang gipanid-an? Mag-undercover man gani ang uban ug tago kaayo ang ilang pagkapulis. Sa kadugay nang gibuhat kini sa kapulisan, nganong karon ra man si Osmeña mipalag? Sa kadugay na niyang mayor, nakahibawo na siya niini nga naandan na kini sa mga pulis. Karon na lang ba nga wa na siya paminawa sa kapulisan sa Dakbayan sa Sugbo? Karon na lang ba nga gikiha na siya sa kapulisan sa Ombudsman?
O di ba kaha ang nagtukmod kaniya mao ang mga operasyon sa kapulisan sa kabukiran sa Dakbayan sa Sugbo diin dunay nagtaptap nga mga pulis?
Di man mahimong illegitimate ang police operation kon dunay mga operatiba nga wa magtaptap, gisunod ang tanang procedures sa Philippine National Police (PNP) ug gipasubay ang tanan sa balaud. Bisan gani ang Philippine Drug Enforcement Agency (PDEA) naghimo ini sa anti drug operations.
Hayan kining iyang pag-alma tungod sa iyang pagtuo nga ang mga pulis gigamit sa pulitika. Duna ba siyay pruyba? Hain may mas gamhanan karon diay, ang iyang mga kaatbang sa pulitika o siya mismo nga maoy mayor, kinsa dunay police supervisory power ubos sa Local Government Code?