IPAUBOS sa psychological evaluation si Renato Llenes, self-confessed killer ni Christine Lee Silawan, aron matino kon naa ba siya sa hustong panghuna-huna sa dihang iyang giangkon ang krimen.
Gawas sa psychological evaluation, kon motugot ang abogado niini, ipa-polygraph test usab kon nagtug-an ba sa tinuod.
Matod ni Police Brigadier General Debold Sinas, hepe sa Police Regional Office 7, nga bisan di magamit sa korte ang resulta sa polygraph test, mahimong giya nila kini kon wa ba mamakak si Llenes.
Si Llenes, kinsa niangkon nga siya ang nag-alyas isip Cj Diaz sa Facebook, nga gikarelasyon ni Silawan, niangkon nga tinuod ang tanan niyang gisulti.
“Ang karon among buhaton sa iyaha, i-psych evaluation siya para siguro kon maayo ang hunahuna. After ana, among plano kon musugot ang iyahang abogado, among i-agi sa polygraph iyang gipang giistorya og tinuod. Kay kon iyahang istorya tinuod nga siya lang, so siya lang,” matod ni Sinas sa mga tigbalita.
Ang PNP Crime Laboratory ang mohimo sa polygraph test samtang ang hospital sa gobyerno ang psychological evaluation.
Daghan ang nagduda nga si Llenes di maoy nagpatay kang Silawan.
Apan matod sa heneral nga adunay lig-on nga ebedensya nga ilang gihuptan.
MIHANGYO
Nagpadala na usab og laing personnel ang Lapu-lapu City Police Office sa inahan ni Christine nga si Lourdes nga una nang nidumili pagpirma sa affidavit tungod kay gusto niya nga iapil sa kaso ang 18-anyos nga unang nadakpan sa National Bureau of Investigation 7 (NBI) 7.
Gipasabot ni Sinas nga di mahimong ilang iapil ang naa sa kustodiya sa NBI tungod kay wa silay ebidensya.
Di usab nila malakip sa reklamo nga gilugos ang dalaga human masuta sa autopsy ni Doctor Benjamin Lara sa Crime Laboratory nga wa kini lugosa.
“Unang una, nganong iyaha man gyung ipaapil ang way labot? Nganong pugson man gyud niya nga ang iyahang anak gi rape nga wa man gi rape? Ngano man gusto niya ikuan niya ang anak. if unsa lay facts, kato lang ang among ipakita, ”dugang ni Sinas.
Apan kon magmagahi ang inahan, didto sila moduol sa amahan aron kini na ang mopasakag kaso ug bahala na ang piskaliya.
Si Police General Oscar Albayalde kombinsido nga si Llenes mao na ang tinuod nga nagpatay ni Christine Lee.
KOMBINSIDO
Kon ang kabanay ni Llenes di makatuo nga mabuhat niini ang brutal nga kremin, alang sa ilang mga silingan sa Barangay Bangkal, kombinsido sila nga ang 43-anyos maoy mamumuno ni Christine.
Ila kining gihulagway nga lahi og linihukan.
Sa interbyu sa Superbalita Cebu, ilang nabantayan nga kon mag-internet sa ilang dapit, kasagaran mga batan-on nga babaye ang i-friend ug i-chat.
“Human atong nabalita ang about ni Christine, nawala na siya diri. Pero mokalit og tunga sa gabii, nga hugaw na kaayo, gisi-gisi ang suot, dayon mokalit na sad kawala. Nanghambog gyud pud na siya nga siya ang nipatay ni Christine, kato bag-o pa na, wala lang mi,” tug-an sa usa sa mga silingan.