MAGPAHIMO ang Provincial Disaster Risk Reduction and Management Office (PDRRMO) og desalination plant sa isla sa Bantayan isip usa sa mga tubag sa kakuwangan sa tubig sa isla.
Ang PDRRMO nangayo og P8.9 milyones nga pundo sa kagamhanan sa lalawigan sa Sugbo alang sa pagtukod sa treatment plant sa Bantayan Island nga nagpaabot sa pagtugot gikan sa Sangguniang Panlalawigan.
Matod ni Baltazar Tribunalo, pangu sa PDRRMO, nga kabahin kini sa ilang response plan human ang mga molupyo sa gamayng isla sa Kinatarkan, lungsod sa Santa Fe, nisugyot nga mag-desalinate sila o ang proseso sa pagkuha sa asin gikan sa tubig sa dagat, aron kini mainom sa mga tawo.
“Mao na nga nagtan-aw ta ron niana kon unsay pinakadali. Part seguro na sa atoang response plan,” sumala ni Tribunalo. Sigon niini nga gihisgutan na kini nila ni Gobernador Hilario Davide III nga dapat usa kini sa ilang himuon nga angay papaspasan.
Gusto ni Tribunalo nga ipa-regulate ang paglungag sa mga tawo sa yuta sa bisan asa aron dunay tinubdan sa tubig.
“Kay ang possibility, taas karon ang level didto sa Kinatarcan pananglitan nga ang pagsulod sa tubig parat nana gyud sa ilang mga kaislahan kanang gitawag og salt water intrusion,” pahayag niini.
“So, balik ta sa palisiya ana, kay other than hubas sa atong sources sa tubig, na-deprived ang atong mga tawo, lisod kaayo ang pagpablik sa tubig tab-ang,” dugang ni Tribunalo.
Siya nibutyag sa walo ka tabay nga ilang gisusi, tulo niini kay parat nga tubig gyud ang mainom nga nagpasabot nga naghinobra na ang extraction.
Gusto usab niya nga pamultahon sa PWRA ang masakpan nga nagpatuyang og lungag sa yuta aron dunay tubig.
Apan ang PWRA dili pa makabuhat niini gumikan kay wala pa mapalabang sa Sangguniang Panlalawigan sa Sugbo ang ordinansahon alang sa giduso niini nga Water Code for the Province of Cebu nga nalangay na.
Si Engr. Edgar Sibonga, executive director sa PWRA, niingon nagsige og kauswag ang pagpahigayon og public hearing nga mahitabo human na sa piniliay sa Mayo 13.
Matod niya, pinaagi sa Water Code sa lalawigan, duna nay makusganon nga pag-monitor sa illegal nga well drillers ug kadtong naghinobra sa pagkubkob sa yuta nga way mga permit.