PIPILA lang kaadlaw sa surprisang pagluwat ni Magic Johnson isip president sa basketball operation sa Los Angeles Lakers, gitaktak usab dayon ang headcoach niini nga si Luke Walton human sa tulo ka sunodsunod nga season.
Ang general manager sa Lakers nga si Rob Pelinka mipahibawo sa maong kalamboan kagahapon, tulo ka adlaw human sa pag-resign ni Johnson.
Si Pelinka mihulagway nga ang wagtang ni Walton sa team ila nang nasabutan.
Isip headcoach sa team nga adunay 16 ka titulo sa NBA, si Walton, kanhi forward sa Lakers, adunay record nga 98-148. Ubos sa iyang pagdumala, wala gyud makasulod sa playoffs ang Lakers bisan pa man og sa paghiabot ni LeBron James.
“I want to thank Jeanie Buss and the Buss family for giving me the opportunity to coach the Lakers,” matod ni Walton sa iyang giluwatan nga pamahayag ngadto sa Lakers. “This franchise and the city will always be special to me and my family.”
Si Walton nahitapo sa Lakers niadtong 2016 human sa malambuon niyang pagpakig-ayuda isip assistant coach ni Steve Kerr sa Golden State Warriors.
Sa niaging season, gihatagan siya og tahas sa pag-umol og mga players nga langkuban sa mga beterano ug potensiyal nga mga batan-on.
Gawas kang James ilang nakuha si Rajon Rondo nga ilang gipapirma lang og usa ka tuig, nga makigkauban sa mga presko nga naglangkub nila ni Brandon Ingram, Lonzo Ball, Kyle Kuzma ug Josh Hart.
Apan ang usa sa mga gihulagway nga nakapahugno sa moral sa team mao kadtong tinguha sa management nga mabira ang serbisyo ni Anthony Davis sa New Orleans forward, baylo sa pipila ka mga players lakip na ang mga batan-ong starters.
“It affected us a lot,” pabuhagay sa guard nga si Kentavious Caldwell-Pope. “Once the trade talk was there, the locker room changed. Everybody was pretty much worried about that, especially guys that haven’t been through it. They were worried where they were going to end up.”
Nahimo usab nga isyu sa mga fans ang kapabilidad ni Walton sa pagdala sa team ilabi na ang paghatag og playing time ug rotation sa mga players.
Hinuon dunay nakauyon sa sistema ni Walton.
“Want to thank Luke and the rest of the coaching staff for allowing me to be me from day 1,” matod ni Kuzma sa iyang twitter account. “They say opportunity is everything in the league and they gave me that right from the jump.”
Nanglantaw karon ang Lakers sa ilang ikaunom nga coach human sa pagretiro sa multi-titled coach nga si Phil Jackson niadtong 2011.
Usa sa gihugon-hugonan nga ipuli ni Walton mao ang kanhi coach sa Cleveland Cavaliers nga si Tyronn Lue, ex-guard sa Lakers nga suod usab ni James.
Laing kandidato mao si Monty Williams, assistant coach sa Philadelphia ug kanhi coach sa New Orleans. JBM