SAMA sa gilauman, niposte og knockout nga kadaugan si Vasiliy Lomachenko batok sa iyang challenger nga si Anthony Crolla aron depensaan ang iyang World Boxing Association (WBA) ug World Boxing Organization (WBO) lightweight titles kagahapon sa Staples Center sa Los Angeles, USA.
Sa nag-unang tulo ka rounds, tataw nga mas maayo og abilidad si Lomachenko ug iyang gikulata’g insakto si Crolla.
Nakalahutay man tuod si Crolla sa mga kastigo nga iyang nadawat niadtong higayuna apan sa 4th round, gitawasan siya’g kulata ni Lomachenko hangtod giundang na lang sa referee ang away, 58 ka mga segundos pa lang ang nakaon sa round.
Human sa away, gihagit ni Lomachenko si Mikey Garcia.
Si Lomachenko misaka sa 13-1, 10KOs nga rekord samtang si Crolla natagak sa 34-7-3, 13KOs nga baraha. ESL