Mga duwa karon: Abril 14, 2019
(Medellin Municipal Gym)
4:30 pm. - Samboan vs. Dumanjug
6:00 pm. - Balamban vs. Mandaue City
7:00 pm. - Danao City vs. Medellin
(Tabuelan Municipal Gym)
4:30 pm. - Consolacion vs. Talisay City
6:00 pm. - Tuburan vs. Minglanilla
7:30 pm. - Tabuelan vs. Sogod
Milusad ang Minglanilla Archangels og dakong rally sa fourth quarter ug ang layup ni King Cabansay sa himatyong segundos maoy nagluwas kanila ngadto sa makutas ug makapakaging nga kadaugan, 73-72, batok sa host Sogod team sa quarterfinals round sa 3rd Governor’s Cup Inter-cities/municipalities nga gipahigayon didto sa Municipal Gym sa lungsod sa Sogod, Biyernes sa gabii, Abril 12.
Perming naggukod ang Archangels ni coach Edito “Itoy” Salacut sa duwa nga gani gibiyaan nabiyaan kini og 15 puntos apan nakakita kini og gamayng lungag sa katapusang kanto nga maoy ilang gihimong agianan ngadto sa kadaugan nga nakapahilom sa mabagang dumadapig sa ilang kaatbang.
“Sayo kaayo silang nakabulhot, naglisod gyud og apas,” matod ni Salacot. “Breaks of the game lang to namo.”
Nangulo sa Minglanilla ang ilang forward nga si Lyel Eredera nga may 18 puntos samtang si Cabansay, regular mainstay sa Southwestern Baby Cobras, mitali og 10 puntos.
Miayuda usab sa katapusang rally sa Minglanilla sila si Alvier Alforque ug Mark Nebril.
Samtang saktong dominasyon ang gisubo sa defending champion Talisay City Aquastars sa quarterfinals round, 104-79, batok sa Tabuelan sa Bracket B.
Upat ka mga Aquastars ang mitapos sa duwa nga may double figures nga gipangulohan ni Keaton Taburnal nga may 23 puntos.
Ang seasoned pointguard nga si Jay Deiparine midalit og 19 puntos, Ronan Briones 17 ug Clark Ruedad nga mitali og 11.
Sa habig sa Tabuelan, si Jansher Salubre mitapos sa duwa nga may 30 puntos.
Ang Consolacion Sarok Weavers mirehistro sa ilang ikaduhang sunodsunod nga daog sa quarterfinals pinaagi sa paglubong sa Alegria, 77-67.
Sila si John Dalumpines ug Keith Padayogdog mipakli og tag 14 puntos alang sa Consolacion ni caoch Paul Flores. JBM