USA ka tam-is nga surprisa ang nasayran ni Morela Gonzales gikan sa kamanghurang anak nga si Leeve Amiel, sa wala pa mo-graduate sa Grade 6 sa Pardo Elementary School (PES), dakbayan sa Sugbo niadtong Abril 2, 2019.
Si Leeve nitapos sa elementarya isip usa ka honor student nga 90 percent ang average grade.
“Nakahilak ko pagkahibawo nga mo-graduate siya with honors. Ang iyang papa kay na-shock pud,” asoy sa 46 anyos nga inahan, maestra sa Don Carlos A. Gothong Memorial High School, ning siyudad, human masayod sa maayong balita, sa wala pa ang seremonyas sa graduation.
Ang achievement ni Leeve, dili lang alang sa iyang mga ginikanan nga sila si Morela ug Leo, kondili apil usab sa mga maestra sa Special Education (Sped) Center sa PES nga sila si Gina Villapez, coordinator sa Sped; Adeline Gabuya ug Michille Martinez.
Si Leeve, 15, may Autism Spectrum Disorder (ASD). Siya 2 anyos pa lang dihang gipa-assess sa iyang inahan human makit-i ang mga timailhan nga susama usab sa iyang maguwang nga si Christian, 20, kinsa may ASD usab.
Walo ka tuig na si Leeve sa Sped Center sa PES, diin ang ikaduhang tuig niini gipaapil na kini sa regular nga klase sa Grade 1 sa edad nga 9.
Siya ang labing unang tinun-an sa Sped Center sa PES nga naapil sa full inclusion sa regular class nga nakatapos sa elementarya ug with honors usab.
Pagkasayod ni Morela nga pulos dunay ASD ang iyang duha ka mga anak, sa sinugdanan naluoy kini sa iyang kaugalingon ug nahadlok unsay ilang mamahimong ugma.
“Nangandoy ka maghimo og pamilya unya mahibawo ka nga ang imong mga anak kay lahi sa ubang mga bata. Nahadlok ko di sila makahuman og eskwela,” sugilon ni Morela.
Apan ang inahan wa mawagtangi og paglaom ug nasayod kini kon unsa ang iyang misyon dinhi sa kalibotan--ang paghigugma, pagtabang, pagsuporta, pagpangga ug pagdawat sa iyang mga anak.
“Dili gyud ikauwaw ang mga anak. Unsay mahatag niya karon, suportaran nimo. Don’t expect too much kay ang tendency ana ikaw ang masakitan, struggle sad sa side sa bata. Ayaw siya i-compare sa ubang mga bata. Instead, i-praise siya sa iyang capabilities,” dugang ni Morela.
Gawas nga honor student si Leeve, nakadawat usab kini og awards gikan sa Sped sama sa Batang Maaasahan Award, Budding Mathematics, Sped Buddy Award ug perfect attendance atol sa ilang Recognition Day niadtong Abril 3.
Siya kay usa usab sa pambato nga mga atleta sa PES.
Si Villapez niingon nga sukad 2012 hangtod sa 2018 kay kanunay isangka si Leeve sa Central Visayas Regional Athletics Association (Cviraa) diin kanunay kini nga gold medalist sa event nga athletics.
Si Villapez mapasalamaton sa pagmahal ug suporta sa mga ginikanan sa mga kalihokan nila sa Sped alang sa kaayohan sa ilang mga tinun-an. SCG