Sugilanon: Batch 1990

AGUSTO 31,2018. Luwan ko sa ‘midnight trip’ sa Ceres Bus paingon sa among dapit sa Talisay nga sakop sa lungsod sa Santander. Bisag giunsa kog pugos ang akong kaugalingon aron malingaw sa ubang butang, apan daw dihay gahom nga mimando sa akong mga tudlo aron tulpukon ang ‘password’ sa akong selpon.

Pagka taudtaod gi-open nako ang ‘group chat’ nga ‘account’ nga gilangkuban namong Batch ‘90 sa hayiskol pa ko. Nakapahiyom ko nga nagtan-aw sa mga ‘picture’ nga gi-upload ni Alicia Bilangdal ug Glenna Lerio (mga klasmeyt nako sa hayiskol), kuha kaganihang buntag atol sa parada sa gipahigayon nga Grand Alumni Homecoming. Nahimuot ko nga nagtan-aw nga bisan sa duol tulo ka dekada nga wala na kami magkita, bisan sa daklit nga pagtan-aw sa ilang mga hulagway nailhan ko dayon sila. Sama nilang Junjun Amando, Sabino Dinolang, Marlon Binag, Jimmy Rusiana,Catherine Ferrater, Allan Bilangdal, Genevieve Hugo, Bernardo Mayola ug Glenda Barbon. Samtang diha ko sa maong kahimtang, dihay hibatyagan ko nga kasakit o di kaha kamingaw nga nangusi sa akong galamhan. Unsaong wala man ko makatambong ning kalihukan nga gipasiugdahan sa among ‘alma mater’ nga mao ang San Sebastian National High School nga naa mahimutang sa Bato, Samboan.Natayming man god nga daghan kayo kog apsunon nga trabaho ning kompaniya.

Namudlat ang akong mga mata sa sunod kong nasaksihan. Nag-Facebook live si Phoebe Jimenez! Wala ko na gyud kapugngi ang akong kaugalingon. Nakahilak na gyud ko nga nagtan-aw sa ‘video’ sa akong mga klasmeyt, diin lingaw kaayo silang nag-jamming ug nanayaw sa mga tukar nga sikat sa panahon sa among kabatan-on. Kasuya ko na man nga nagtan-aw ug naghunahuna nga wa ko makaapil sa maong kalihokan. Naglagot ko nga wa gyud mobulig nako ang higayon. Sa akong nasaksihan kanila nakaingon ko nga tingali I have missed one of the happiest moments in my life.

Unya daw sa adunay ‘time machine’ ang akong hunahuna nga mibalik pagligid ngadto sa panahon sa among kabatan-on. Hupong kami kaniadto sa lingaw ug kalipay, labi na kon kompleto nga magkakuyog ang among .batch’ nga glangkuban ug duha ka ‘section’ nga mao ang Section Del Pilar ug Section Rizal. Wala namo igsapayan nga busluton usahay ang among tsinelas nga gisul-ob ug pinutos sa dahon sa saging ang kan-on nga among gibalon alang sa paniudto. Basta magkakuyog kaming tanan daw sa kompleto na ang among adlaw. Ingon ana mi kasuod kaniadto.

“Till we meet again!” dungan namong gilitok ang maong mga pulong samtang luhaan ang among mga mata nga nag-group hug human sa seremonyas sa among gradwasyon.

“Walay kalimtanay, ha?” maoy nalibkas sa among mga ngabil sa dayon na namong panamilitay.

Septiyembre 1, 2018. Pista sa parokya sa Bato. Gikaatol ko sa pagpamista sa ilang Glenna silang Merilyn Tolentin, Wilfredo Bigno ug si Fe Geromo nga kuyog niya ang duha niya ka anak dalaga. Labihan ang among hangpanay, nga sa akong tan-aw nanumbalik ang kaniadto namong kamaya.

Wala magdugay nanamilit kami sa tagbalay aron balay-balayon namo sa pagpamista ang tanan namong mga klasmeyt kansang residensya nia lang gihapon sa Bato.

Labihan na man gyud ang kasurprisa ug kalipay sa magtiayong Ronel ug Rosalinda Supatan (mga klasmeyt namo nga maoy nagdayon pagkaminyo) ning wala palandonga namong pagbutho sa ilang panimalay.

Hibatyagan ko nga bisan sa daghang kausaban nga namugna sa panahon, wala kini makapausab sa among tinagdanay. Kining adlawa diin gikauban kog balik ang pipila ko ka mga klasmeyt maoy usa ko ka kasinatian nga handumon ko niining nahibiling mga adlaw sa akong kinabuhi. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph