NIADTONG hinapos sa Disyembre, nisaka ko sa Busay, nga maoy akong praktisanan og tungas sugod sa 2010. Karon magsak-anan man tuod ko pero magsakay na kog scooter maghatod sa akong asawa sa GMA 7.
Kon kadaghanon sa mga sakyanan ang hisgutan, lahi na kaayo ang kahimtang ini siyam ka mga tuig na ang nakalabay. Sayo pa gani sa buntag, daghan nang magbahis bahis. Misamot pa nga nagkadaghan na ang mga sakyanan nga mag-park daplin sa karsada.
Nagsige na man unta og operate ang Cebu City Transportation Office ubos sa pagpangulo sa akong higalang si Francisco Ouano, pero sukad bag-o na ang barangay kapitan, wa na ko kakita bisan anino na lang sa mga traffic enforcer.
Naghisgot ko ini tungod sa akong nasagap nga estorya nga ang nakaingon sa aksidente sa usa ka sports utility vehicle (SUV) sa may karsada sa PC Hills mao ang pagkasabod sa ligid ini sa laing sakyanan nga giingon nga naka-park. Kon tinuod ni, di unta mahitabo ang aksidente kon strictly enforced pa ang no parking sa mao nga karsada.
Gikan sa may eskina sa JY Square, padung na ngadto sa Busay barangay hall, imong makita ang mga sakyanan nga naka-park bisan tungod sa no parking signs. Kon di tahuron ang no parking signs ug way makapatuman ani, mas maayo pag panagtangon na lang na.
PRESSURE
Di ko motuo nga ang akong higala wa molihok. Apan mag-unsa man ang imong kaikag sa pagpatuman sa balaud kon dunay mga dagkong pulitiko nga mopatunga. Way mahimo. Kaniadto sa panahon ni Joy Tumulak, hapit kada adlaw ang operasyon sa pagpamadlong mga habalhabal driver nga anha magtambay sa daplin sa karsada sa may JY.
Pagpuli sa akong higala kang Tumulak, naa pay sige og pamadlong. Apan human sa barangay elections, kada takdol na lang sa buwan ang operasyon. Di usab ko makabasol aning mga tawhana, kay nanginabuhi ra baya ni sila. Basin dunay political pressure.
Maayo unta kon kining mga driver pangitaan og lugar nga kabutangan. Nakakita man gani og parking area ang mayor alang sa mga motorsiklo ug scooter sa Lahug, nganong di man mapangitaan og maayong pwesto ang habalhabal drivers? Sigehan na lang tawon ni silag atik-atik sa mga pulitiko.
IPATUMAN GYUD
Kon magpanagana ang atoang mga awtoridad sa pagpatuman sa balaud sa trapiko, way padulngan ang mga paninguha sa pribadong mga grupo, sama sa Cebu Road Heroes.
Mag-unsa ang pribadong mga tawo, kon ang mga tigpatuman sa balaud nahadlok sa political backlash? Mao ni ang hinungdan nga ang atoang mga dan, gubot pa sa lukot. Ang road rage common nang talan-awon sa atoang kadalanan.