GATUSAN sa mga public utility vehicle (PUV) driver ug operator ang matabangan ning tuiga diha sa ilang pagpa-modernize sa mga pampublikong sakyanan sa sunod tuig ug hingpit na makasunod sa programa sa gobyerno ang Public Utility Vehicle Modernization (PUVM).
Kini human nga 300 na sa nga miyembro sa transport cooperative division sa Cebu People's Multi-purpose Coop ang ni-avail.
Gani sa sunod bulan o sa Hunyo, gikatakda na nga moabot ang inisyal nga 15 ka units sa bus sa Sugbo, sa 200 nga ilang tinuguha nga i-purchase.
Gitug-an ni Macario Quevedo, CEO sa Cebu People's Multipurpose Cooperative (CPMO) ug Atty. Gary Maningo sa Transport Service Coop, nga nag-agad nalang sila sa desisyon sa Land Transportation Franchisisng and Regulatory Board (LTFRB) alang sa paghatag sa maong prangkisa ug kon asa ang mga rota.
Kahinumduman nga niadtong tuig 2017 gilusad sa Department of Transportation ang Public Utility Vehicle Modernization Program, diin ang mga jeep ug bus nga 15 ka tuig ug pataas ang dili na padaganon alang usab sa seguridad sa mga pasahero ug sa uban pa.
Gitinguha nga mapatuman sa hingpit ang programa sa sunod tuig, diin dili na bag-uhon ang mga prangkisa kansang sakyanan wala masunod sa PUVMP nga lagda.
Ubos sa PUVMP, dili na mahatagan og prangkisa ang single-proprietorship, kundi kinahanglan nga mag-umol og transport service corporation o cooperative.
Hinungdan nisud ug nitabang ang CPMC, diin sukad Disyembre sa niaging tuig hangtud karon, aduna na sila'y 300 operators sa libuan nila ka mga sakop nga ni-avail, gipaabot nga mas modaghan pa kini sa sunod nga buwan.
Kahinumduman nga daan na gitug-an sa LTFRB-7 nga sa Sugbo lang aduna'y kapin 10 mil ka mga PUV ang nagdagan sa kadalanan.
"The Cebu People's Multi-purpose Cooperative's project is very timely with the PUVMP, 'nya ang nakanindot ani, we are promoting environment-friendly vehicles. At the same time, we are making transport cooperative having the best approach in uplifting the lives of the operators, especially those operators that we have already during when they were still drivers (sa PUV)," asoy ni Quevedo.
Niadtong Sabado sa hapon, Abril 13, nisulod na og kasabutan ug ceremonial turn-over sa card tali sa CPMC ug sa AF Payment Inc. nga mao'y motabang diha sa pag-operate sa mga modernized vehicle nga maggamit na og card imbes nga cash diha sa pagbayad.
Girepresentahan ang API ni Carlo Brian Castelo.
Atol sa MOA signing, anaa ang mga chairman sa nagkadaiya nga division, pinanguluhan sa chairman sa Cooperative, Manolito Adumer, anaa usab ang representante sa Durabuilt Motors Inc. ang supplier sa ilang bus, ug Carl Dueñas ang Secretary general sa Coop Natco, diin affiliated ang CPMC.
Ang CPMC adunay 93 mil ka mga sakop lukop nasud diin 70 mil niini ang naggikan sa Sugbo.