SECTIONS
Saturday, August 17, 2019
BAGUIO

Luzano: Eleksiyon, umadanin; kontrobersiya pumingpinget!

Karit Ken Kayetket

HUSTON sa ti pagsasao: umas-asideg ti kalat, rumigrigat nupay umim-imas! Adda kadakayon, kailian ti kaibatoganna a pannao dayta a linya. Ngem no dakami ti mangamiris...nadagsen a kinapudno dayta iti agdama. Bulan laengen ti intay palabsen, addatayto manen iti sango dagiti balota. Intayto manen ilanad dita ti kaririknatayo a mangpili kadagiti kapkapnekantayo nga agsirbi kadatayo. Ngem kadagiti mabilbilang laengen nga aldaw ti panagsagana, adu pay dagiti umasibay a sairo. Dagita dagiti eksena ang mangriro tapno intayo agbiddut a mangeddeng. Ngem no agballigitayo, dayta ti kunada a “rumigrigat nupay umim-imas”. Ngem ala, sakbay nga intay “imasen” dagiti sagumaymay a “pagtedtedan” ti diro ti biag a silsiloden ti agkakalumbitin a sulisog....intay man pay kallien ken ruk-iten dagiti sumagmamano a lagip ti napalabas:

***

Agbiag amin dagiti beterano a kailiantayo agraman kadagiti addan iti sabali a biag nangruna kadagiti kadaraantayo a saan a nakalasat iti Death March. Diak ammo no sadino ti naglemmenganna nga abot daydi lolok ta awan naistoryana. Basta ti matandaananmi a pulina: natured isuna nupay saan sa met a nagpensiyon. Ngem no sibibiag pay la koma ita...mabalin nga iyasana manen ti panabas daydi Ka Andres tapno yikkisnanto no kasapulan dagditi balikas ng: “Diak kayaten ti gubat”! Tsk tsk...mabalin a dayta met ti adda iti utek dagiti sibibiag pay a beterano itay kallabes a 77th Araw Ng Kagitingan. Adun ti nagpasaranda a gubat. Naumadan iti nagpasaranda iti sidong dagiti ranipak ken kanalbuong iti aglawlaw. No adda man tensiyon iti isyu iti panagdappat iti teritoryo, siyento porsiyento a “didan paburan ti maysa pay a gubat”. Iti makabaruanan a gimong...saanen a ti lamma daydi Death March ti maar-arapaap....no di ketdi ti panagungar koma manen ti Death Penalty kontra kadagiti awanan buteng nga agar-aramid kadagiti nadadagsen a krimen. Nainpanawenan dagita a tema agsipud ta umadani manen ti “Nangina Nga Aldaw” wenno Holy Week a ti sentrona ket ti pannakasalbar ti basbasol babaen iti Mannubbot a nailansa iti krus! Arasaas: agpenetensiya ngata dagiti pudpudno a managbasol agraman dagiti “Agin-Aanghel a Sairo”?

***

Umas-asidegen ti ukom kadagiti balangkantis a papili. Dagitinto tiro ken kinapalso nga inda pinangsulisog kadagiti botante ti mismo a manghusga kadakuada babaen iti pinal a pangeddeng ni Juan dela Cruz. Dayta ket mapasarandanto a penetensiya inton Mayo 13 ita a tawen. Ngem kadagitoy a panawen, kaing-ingetanna ti panagraira dagiti demonyo nangruna kadagiti nasusulinek a disso a nalaka a mapurar iti kari ken pirak dagiti botante. Dagita a disso ti paglubnakan dagiti maka-Diyos kano a kasla adipen tapno maipasagepsepda laeng ti gartemda kano nga agsirbi nga iti kutitna ket “bulsada” gayam ti diyosda. Dagita dagiti destino ken terminal dagiti de-ipus ken de-sara a pulitiko a pinagbalindan a negosyo ti pulitika. Adda (saan nga amin) dagitay agpuonan iti ginabsuon a pirak ta ammoda a makabawidanto apaman a tumugaw. Ti nasakit, adda met dagiti nasin-aw ken legal ti panggepna nga agsirbi ngem saan a mapagasatan gapu ta awanan sileng ti inut-utangna piman a pondo. Kas kunada: ad-adu nga amang kano dagiti manangallilaw ken pasaw a kari ngem tay nadalus a panggep. Ti kayatmi a pabasolen ken basnutan ket dagiti umili wenno botante a kabsiw nga agpili. Dagita dagitay nalukneng ti lulodda. Dagita dagitay saan a makatakder iti bukodda a pigsa no di ketdi tay la agsanggir ti ammoda. Dagita dagitay tay la makikirkirab ti aramidda. Iti ababa a pannao, sada la “agling-et no adda agpakan”.

***

Baro a kontrobersiya: adda kano lima a U.S. Senators ti nagaramid iti resolusyon sadiay US Senate a mangbanbanat manen iti Pilipinas. Maryusep! Ta ania ti linaon ti resolusyon dagita a puraw a senador? Puwes...kayatda a “mawayawayaan” kano ni Senadora Leila De Lima. Maryusep manen! Iti dayta pay laeng a gannuat, siento porsiyento, kuna ti kaadduan, nga adda dagiti kontra-Duterte ti napan nakisarita kadagita a Puraw a Senadores ti US isu a nagaramidda iti resolusyon. Ala, sakbay nga intay is-issuan a kudkudan ti kilikili dagita a mammanday-linteg ti Amerika, intay man pay bigbigen ida: ti uloda – US Senator Marco Rubio ti Florida; dagiti pasurotna: Marsha Blackburn ti Tenessee, Chris Coons ti Delaware, Richard Durbin ti Illinois ken Edward Markey ti Massachusetts. Saludsod: ammo ngata dagitoy a US senators a ti Pilipinas ket saanen a kolonya ti US? Sinnoda koma nga agdiktar kadatayo? Adda bassawang” “Hoyyy saan a “tuta” ti Amerika ti Pilipinas nangruna ni Digong!” Saanda ngata nga ammo a ni Sen. Leila De Lima ket nakakulong gapu kadagiti kasona panggep iti illegal a droga? Saanda ngata nga ammo nga iti panawen ni De Lima a kas DOJ secretary ket kimmaro ti negosyo iti illegal a droga a ti sentro ti operasyoda ket ti mismo a Bilibid? Kinapudnona, binuweltaan ni Senate President Vicente Sotto lll dagiti lima a US senators. Impir-akna a ti Pilipinas ket saanen a kolonya wenno “commonwealth” ti Amerika ken dida ammo ti background ti hudikatura ti pagilian. Innayon pay ti senador a kas pangarigan ta agaramid met ti senado iti resolusyon a mangkunkundina iti aramid dagiti taga-Amerika nangruna iti senadoda...imposible met nga umanamongda. Kinampian met ni Senador Panfilo Lacson ni Sen. Sotto iti dayta a takder. Kuna met ni Presidential Spokesperson Salvador Panelo: “Mind your own business”. Matagtagiuray met no ania ti personal nga opinion ni Pres. Duterte. Yamakmi nga agbusi manen a kasla guttling gun ti dilana.

***

Dimmegdeg ti tensiyon sadiay North African Country itay nabiit. Mainaig iti daytoy, nagsaganan ti gobyernotayo nga umasiste kadagiti OFWs wenno kailiantayo a mabalin a maipit sadiay. Kuna ti DOLE a nakasaganadan a mangiyemplementar iti deployment ban ken pag-repatriate kadagiti kailiantayo sadiay Libya. Nagdeklara metten iti Alert Level 3 ti POEA a ti katukadna ket boluntaryo a repatriation kadagiti maseknan nga OFW a kayatdan ti agawid manipud Libya. Ti Alert level 4 ket katukad ti forced evacuation no kasapulan. Ikararagtayo a sapay koma ta malpasen ti tensiyon sadiay.

***

Intay sublianen ti “rigat ken imas” issue: Imas para kadagiti managgundaway gapu iti pulitika. Iti bassit a “rigatda”, gapu iti sam-it dagiti annak ti sinalbag a karkarida a nangpapati met kadagiti nasulisogda a botante...”agsung-abdanto” iti “sultop” dagita a rigat a mangitonda iti “agar-areng-eng nga imas” iti kinasairoda. Iti rungtona, dagiti piman nga umilinto ti agpasar iti liday ken pannakaupay. Agbabawitaytoman, naudin ti amin. Agar-areng-engen iti imas dagiti sinalbag nga aniniwan ti sairo idinto ta agsublinto manen dagiti piman a biktima iti kas kasisigud: panagtuok, panagrigat nga awan patenggana. Isu nga ita pay laeng, pards...ibukiladmon dagita matam saan a dagita dakulap ken bulsam. Kilatisem a naimbag dagiti sairo ken anghel iti panawen ti basingkawel. Ti sangasalup a biddut, kaibatoganna ti tonelada ti pannausa ken babawi. Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph