FRED FUENTES MONTERNEL
Lorega Proper, Cebu City
NAGLAGITING ang kainit sa kaudtuhon sa Biyernes Santo dihang nahiabot si Roy sa Mt. Tabor sa Talamban sakay sa iyang motorsiklo. Human ikaparking ang iyang motorsiklo sa ‘parking area’ sa mga sakyanan, nagdali siyang miuliot sa bagang duot sa mga tawo nga kasagaran sakop sa lainlaing relihiyusong kapunongan nga nagpadayon sa ilang tinuig nga tulumanon sa VIACRUCIS o Dalan sa Kruz, isip pagpamalandong sa mga pag-antos, kasakit ug pagpakamatay ni Hesukristo nga gilansang sa krus didto sa bukid sa Kalbaryo.
“Ayaw kalimot, ha, Roy! Moapil tas Dalan sa Krus nga ipahigayon sa atong relihiyusong kapunongan adto sa Mt. Tabor sa Talamban,” kini ang gisulti ni Ashley kang Roy sa naghinangat pa ang mga adlaw sa Semana Santa.
Si Ashley mao ang babayeng mubog lupad nga katagi-barangay ra usab ni Roy, nga bisan kinsa lang nga mga lalake ang gikarelasyon, ug maoy nagkumbinser kang Roy nga magpasakop sa usa ka relihiyusong kapunongan. Si Roy nga ulitawong gulang ug may napondar nga ‘five-six’ nga negusyo sa tanang merkado publiko sa siyudad sa Sugbo, wala nay panahon sa pagsimba sa Ginuo ug nahikalimot na sa pagdayeg ug pagpasalamat sa Ginuo. Ambot og unsay birtud ni Ashley nga nakabig man niya si Roy aron magpamembro sa usa ka relihiyusong kapunongan diin siya (Ashley) nahisakop. Nagkasuod gayud sila. Ug naamguhan na lang ni Roy nga nahigugma siya sa dalagang inday-hilay. Misamot ang ilang kasuod dihang anha na magkatulganan ni Ashley sa apartment ni Roy ug misaad nga magbag-o na kini sa iyang kinabuhi ug mohunong na sa iyang pagka inday-hilay, tungod kay parehas na silang sakop sa relihiyusong kapunongan.
Alang kang Roy guwapa si Ashley, puti og kutis ang pamanit, seksi ug pormag lawas gayud si Ashley. Mao nga way lalake nga di maibog kaniya. Si Roy kuwarinta anyos na ug siAshley mao pay pagtungtong sa edad nga bayntey singko.
“Sige, Ash. Moapas lang ko ninyo sa Mt. Tabor sa Biyernes Santo ug moapil ko sa tulumanon sa Dalan sa Krus nga ipahigayon sa atong relihiyusong kapunongan,” pasalig ni Roy kang Ashley.
DIDTO sa Mt. Tabor naabtan ni Roy ang grupo sa ilang kapunongan sa ika-14 nga estasyon. Nagpahiyom si Ashley nga miduol dayon kang Roy.
“Abi kog di na ka moabot,” hunghong ni Ashley kang Roy.
“Nakasaad ko nimo, Ash! Magpenitensya sab ko... tungod sa akong gugma nimo!” ni Roy nga migunit sa kamot sa dalaga.
“Tungod sab sa akong gugma nimo, Roy, nakhukom ko nga hingpit nang magbag-o! Mohaw-as na ko sa lapukon kong kalibutan.”
“Di ko igsapayan ang matang sa imong pagka babaye, Ash. Ikaw ang nagkabig nga mobalik sa sabakan sa Diyos. Ang pag-apil ta karon sa Dalan sa Krus ning adlaw sa Biyernes Santo maoy sakripisyo sa matuod tang gugm, Ash!”
Sa unahan, sa tumoy sa Dalan sa Krus, gilantaw nila ni Roy ug Ashley ang dakong krus diin gilansang ang Ginuong Hesus. Puno sa paglaom nga magbag-o alang sa ilang gugma hugot nga nagtinutokay sila si Roy ug Ashley. (KATAPUSAN)