MAKUTAS nga dalan ang gilatas as Medellin Sweeteners aron buntogon ang host Danao City team, 90-88, sa ikaduhang adlaw sa quarterfinals round sa 3rd Cebu Governor’s Cup Inter-cities/municipalities 21-under basketball tournament niadtong Sabado sa gabii, Abril 13 sa Danao City Sports Complex.
Sila si Gelmart Umpad ug Fritz Saladaga maoy nahimong sentro sa kadaugan human kini nagkumboya sa himatyong segundos aron ihatod ang Medellin sa ilang ikaduhang sunodsunod nga kadaugan.
Human sa ginabsanay og sakmit sa bintaha sulod sa kapin tulo ka mga kwarters, ang Medellin hinayhinay nga mipabukad sa ilang labaw sa katapusang tres minutos.
Apan ang trapping defense nga gilusad sa mga batos ni Danao City coach Edzel Vallena sa himatyong segundos miresulta sa sunodsunod nga turnovers sa Medellin.
Ning higayona, wa mag-usik og panahon ang host Danao City og mipabuto kini og tres nga nakapasikit sa duwa ug nakapahugyaw sa ilang mga dumadapig.
Nabiyaan og singko puntos, 90-85, ang Danao City nakapabuto og tres sa katapusang 11 segundos pinaagi ni Olivar nga naghatag og dakong hudlat sa Medellin.
Apan kadto maoy katapusan nilang hunat nga nahimo sanglit naabtan sila sa pagkapupos sa oras.
Si Saladaga mipakatap og 31 puntos, samtang si Umpad midugang og 18.
Sa kadaugan, ang Medellin nakigsawo na karon sa Mandaue City Ballers sa liderato sa Bracket A nga may 2-0 nga baraha.
Kini human nga sa sayo pa, gidominar sa Mandaue ang Balamban, 116-101.
Diha na nakabuylo ang opensa sa Mandaue sa tungatungang bahin sa fourth quarter human sagad sa mga sinaligan sa Ship Builders lakip sa ilang mga leading scorers nga si AJ Sacayan ug Joshua Gellacone pulos na foul trouble.
Ang bigman nga si Kenneth Brillo, kinsa wa kapugngi sa ilawom nga bahin, mitapos sa duwa nga may 36 puntos, sagad niini sa naghinapos sa second half.
Miabag usab kaniya si Gabriel Cometa nga 23 samtang tag 14 puntos sila si Archie Bugsay ug Paul Sungahid.
Si Sacayan nangulo sa Ship Builders nga may 30 puntos, Gellacone 24 ug 21 usab ang nahimo ni Jacob Fernandez.
Ang Argao (1-0), gibituonan ni Jimwell Torion Jr., anak ni kanhi PBA star Jimwell “Tora-tora, Torion, yano ra usab nga midabo-dabo sa Samboan, 94-65.
Ang Samboan, sama sa Danao, nahagsa sa 0-2 nga baraha, samtang ang Balamban mitali og 1-1 nga record. (JBM)