TAGUM CITY -- Sikop ang usa ka opisyal sa Bureau of Fire Protection (BFP) ug ang babaye nga kauban niini atol sa drug bust operation nga gihimo sa Drug Enforcement Team sa Tagum City Police Station Biyernes sa buntag didto sa Purok 3, Crossing Rattan, Barangay Apokon.
Ang suspek giila nga si Rolando Mayo Jardenico, 43-anyos, minyo, residente sa Purok Bougainvilla, Mirrafuentes, Barangay North, Tagum City kinsa aktibo nga sakop sa BFP-Davao nga nadestino sa Dujali Fire Station sa Municipality sa B. Dujali, Davao del Norte, nga dunay ranggo nga Senior Fire Officer 1 [opisyal nga ranggo].
Sikop sab ang kauban niini nga si Sherry Mae Quilapio Pangawas, 30-anyos, dalaga, ug residente sa Purok 1-A, Barangay Tuboran, Mawab, Comval Province.
Subay sa report, giingong mokabat P12,000 ang kantidad sa alegasyng shabu nga nakuha sa posisyon ni Jardenico ug usa ka pakite sa gituohang shabu sa posisyon ni Pangawas.
Si Jardenico anaa sa kategorya nga High Value Target sanglit empleyado kini sa gobyerno.
Giproseso na ang kaso nga ipasaka sa mga dinakpan ug nakatakdang mataktak sa serbisyo sa BFP si Jardenico. (RFN)