STA. MARIA, Davao Occidental -- Giklaro sa Bureau of Fisheries and Aquatic Resources (BFAR)-Davao nga luwas gihapong kaonon ang mga isda gikan sa lugar luyo sa abiso nga apektado sa red tide ang mga kinhason sa Sta. Maria.
Gibutyag ni Raul Millana, pamuno sa Fisheries Production Support Services Division sa BFAR-Davao, nga angayang hugasan pag-ayo sa limpyong tubig ang isda una kini lutuon.
Apan, tungod sa taas nga toxin level sa mga kinhason hugot nga gipahimagnoan ang publiko nga likayan una ang pagkaon niini.
Unang gi-anunsyo sa BFAR nga apektado sa red tide ang mga kinhason gikan sa kadagatan ning lungsod ug sa Balite Bay sa Mati, Davao Oriental nga gitawag og “paralytic shellfish poisoning.”
Nanukad ang toxins sa mga kinhason gikan sa Harmful Alga Blooms (HABs) ug polusyon sa dagat.
Ang mga pasayan angayan sab nga kuhaan og ulo una lutuon.
Anaa sa Barangay Tanglad ug Mamacao ang 117-ektarya sa mariculture nga Bangus ug sa silingang Malalag Bay mao nga gidili sab ang pagbiyahe niini aron di maapektuhan sa kontaminasyon ang ubang tubig dagat.
Gidason sa BFAR nga usa ang El Niño nga nakahatag og kontaminasyon sa tubig dagat tungod sa kainit sa adlaw. (OBD)