PIKIT, North Cotabato -- Nagdangoy-ngoy sa sobrang kasakit ang usa ka negusyante nga gipusil kinsa naigo sa iyang lubot ug milapos sa iyang kinatawo alas 5:55 sa hapon niadtong adlaw nga Sabado sa probinsiya sa Cotabato.
Giila ang biktima nga si Madalo Atip, 41-anyos, minyo, negusyante ug molupyo sa Sitio Lamak, Barangay Poblacion, Pikit, North Cotabato.
Matud ni Police Major Mautin Pangandigan nga samtang naglingkod ang biktima sulod sa iyang balay kalit lang mibutho ang duha ka wala mailhing tawo dayon namusil gamit ang kalibre 45 nga pistola.
Misibat sab dayon ang mga namusil sakay sa usa ka motorsiklo nga walay plaka paingon sa hilit nga dapit sa Pikit.
Gisapupo si Atip sa iyang pamilya ug gidala sa Cruzado Medical Center sa Pikit kinsa anaa sa grabeng kahimtang gumikan sa nahiagoman sa iyang kinatawo.
Naka-angkon og samad pinusilan sa iyang likod, lubot, kilid ug kinatawo ang biktima.
Rido o personal nga atraso ang gilantaw sa otoridad nga motibo sa pagpamusil sa negusyante nga padayon nilang gi-imbestigahan ning mga panahona.