NAGLARAW si Toledo City Mayor Sonny Osmeña nga ibuwag gikan sa lalawigan sa Sugbo ang mga lungsod gikan sa Barili ngadto sa Tuburan, lakip sa Toledo City, ug himuong usa ka lalawigan kon modaug siya sa pagkakongresista sa tersero distrito sa eleksyon sa Mayo.
Matod niya, ang unang balaudnon nga iyang ipasaka sa Kongreso mao ang paghimo sa bag-ong probinsya, ang Occidental Cebu, nga maoy mopalambo sa tersero distrito ug sa syudad sa Toledo tungod sa dugang pundo gikan sa gobyerno nasyonal.
Mao na kini ang uso karon. Bag-o lang nga gipirmahan ni Presidente Rodrigo Duterte ang usa ka balaod nga maghimo sa Palawan nga tulo ka probinsya – ang Palawan del Norte, Palawan Oriental ug Palawan del Sur.
***
Apan unsay ikasulti niadtong nisupak sa Sugbuak, nga buak-buakon ang Sugbo ngadto sa upat? Kon nadayon pa ang Sugbuak, alegre unta kaayo ang Sugbo. Tiaw mo bay upat ang atong Kapitolyo, upat ang gobernador, upat ang bise gobernador ug upat ka provincial board. Daghang mga politiko ang makatrabaho.
Ang kang Mayor Sonny Osmena nga plano mao nga mabuwag ang third district. Ang Sugbo mahimo na unyang duha ka probinsya. Ang Occidental Cebu adunay duha ka congressional districts, gawas sa kaugalingong gobernador, bise gobernador ug provincial board.
Matod ni Osmena, nga iyang gipaluyohan ang kandidatura ni Vice Governor Agnes Magpale sa pagkagobernador ug ni Governor Hilario Davide III sa pagkabise gobernador.
***
Si Magpale niingon nga bukas siya sa paghimo sa Occidental Cebu apan kinahanglan pa kining tun-an. Moagi pa usab kini sa usa ka plebisito ug kinahanglan nga pagauyonan sa mga Sugbuanon.
Sama sa balaod nga maghimo sa Palawan nga tulo ka mga lalawigan. Bisan kon napirmahan na kini sa pangulo, moagi pa kini sa usa ka plebisito sa pagtino kon giuyonanan ba kini sa mayoriya sa katawhan sa maong lalawigan.
Ang kalamboan sa tersero distrito gihimong katarungan sa paghimo niining usa ka lalawigan.